Read Chang Naga NYENSANG CHIA 19 Bible Online

NYENSANG CHIA 19 - Chang Naga bible

NYENSANG CHIA 19

¹Müh shuongei Mühghaü soneikangbü ngetida, hoba müh tuan phobüei haoeibü ikkümiklei lenda.

²Chalou angboua ngüh longda, hoba langyang weko songsido lenda.

³Ngühyem ayingsi ngühlang ai aki; haoeneibü ngüh ditla athükda.

⁴Khei yingasikei haoeneibü ngüh kaodak pendou ae hauda; hoba haoeneibü ngühlang kaodak thonbü sühko hauda. Mühnyua haoei chanyu shanga neichem che danga.

⁵Hao chemkanbou chem maang ka longbü tegü ki, hoba hau kibü müt tegü takletbü lama laangda.

⁶Hao longshang mühthon thinei kia, hoba thon sühko tuda, hoba hao aubü ka ai huan aki.

⁷BUNYUBOUeibü ngühkhüm kho benbüsoubü, hoei hau kitida, kho janbümubü, songlanbü shuong la songsido kuda.

⁸BUNYUBOUeibü ngühkhüm kho maimaitham hoba khoei maangpon olintida. BUNYUBOUei sakkubü kho tangbü hoba ditenbü maibü kuda.

⁹BUNYUBOU to hatbü kho hinseibü hoba ponpen kida; BUNYUBOUeibü soumo kho chongchingbü, kho lepde mudonga saopobü ki.

¹⁰Hon tokei kho aei maangdühlabü. haü, hon maibü juong tokei maikubou; naodei hoba hap tokei teibou.

¹¹Tokei khübü kho jungeibüei kaibü sambou maangsangtida; khübü kho jungeibüa jongsak yaang kia.

¹²Aoei haoeibü shedbü chühenkei? Huan kibü shedbü ka ngo saüenkushi.

¹³Jembü apubangbü shedbü shabü ka no khangenbou senetshi; khübü khoei ngo tejungeiti. Khei yingsi ong ngo tangan kilabü; hoba ngo ayingbü kümsilei yaangbü ka satenan kilabü.

¹⁴O BUNYUBOU, ngeibü laangnyu hoba ngo khümenbou, kü sembung ka longbü ngüh hoba kü maangponei damanchühbü nyi sungletenlabü lele yingtishi.