Read Chang Naga NYENSANG CHIA 22 Bible Online

NYENSANG CHIA 22 - Chang Naga bible

NYENSANG CHIA 22

¹Kü Mühghaü, kü Mühghaü, aila nyi ngo apyoda? Kü to thuilabü ka hoba ngo wibü ngüh ka no aila halokche bangan kida?

²O kü Mühghaü, ngei changea ngekda, lausikei nyi ajongaida; tokei nangnakkei, lausikei hakso ühüpda.

³Lausikei no Saopobou ki, Israelbü nyensang Choba setshanga setan.

⁴küneibü pisibousi shuongei ka to mailembei; haoenei mailembei hoba nyi haoen khümenkei.

⁵Haoenei ka to ngekkei hoba haoen khümenkei.

⁶Lausikei ngo yangbem, müt aying; mütei nyikubü hoba mütei shoeinakeibü.

⁷Ngo hapbü pendouei ngo attiko nyikuda; haoenei sembung sungda, haoenei khu ngombo lauda.

⁸“Haoei BUNYUBOU la khümbo kukei; haoei hao nakhümen. Haoei hao khümentiashi, aieilausi haoei hao to maang haida.”

⁹Lausikei ngo nasetshang ka sungenbou kho no ki; ngo künyueibü khukua kijinei nyi ngo khümenan phokei.

¹⁰Bukjinei thama ngo ka la jinkukei, Anyuei bukbüyam no kü Mühghaü ki.

¹¹kü ka bangan teki, aieilausi khonsak nyangko kia; hoba thuibü ao aki.

¹²Masu pongsu juongei ngo kailepa. hau kibü Bashanbü masu pongsuei ngo komlepa.

¹³Haoenei, haiyeibü hoba ngühbü molosaonyuei tegü, kü la haakouan litikuda.

¹⁴Ngo dei tegü jonan apda; hoba ngeibü küksihuo pendou lusaka. Ngeibü maangpon naolep tegü kia; maangaenei ho tühyinda.

¹⁵Ngeibü hau chakkok tegü yeia; hoba ngeibü lishang ngeibü ngeia khanglepda; hoba nyi ngo haibü thamngu to sungbaa.

¹⁶Aieilausi kei shuongei ngo komlepa; amaibü kümbü tan cheei ngo komlepa; haoenei ngeibü ik hoba youa sua.

¹⁷Ngei ngeibü lo pendou wela thükakei, haoenei kü to chühda, hoba nyeklang menmentham chühda.

¹⁸Haoenei ngeibü neisimei haoen yoa janyoda, hoba ngeibü neisimei shanga phaang pakda.

¹⁹Lausikei no bangan teki, O BUNYUBOU, ngeibü hau, ngo panteiko thuikai.

²⁰Ngeibü soushou inlou ka khümenshi. Ngeibü langkei kei shuong ka khümenshi.

²¹Molosaonyueibü sembung ka ngo khümenshi; hoba yamkabü masu pongsuei thenbü ka nyi ngo püetshi.

²²Ngei ngeibü jaisinasi shuong la kaibü nyen ngetikho, shuongsiphang yoa ngei no sangkho.

²³Kan BUNYUBOU to souhatbü shuongei hao sangshi; kan Jakobeibü lilabüei hao soneikangtiashi, hoba Israelbü lilabü pendouei hao to souhatko laushi.

²⁴Aishanga naklepbüa kibü khonkubü haoei amangsen ayingsi awailet, hoba haoei haoeibü thenyek hao ka ahu; lausikei haoei hao to ngekjinei haoei ditkei.

²⁵Shuong yaangbü yoka ngeibü nyensang ka ka louda, aoyouei ka to soumo hatda haoen thedanga ngei ka la ngeibü thebülanbü kulabü.

²⁶Eaaoabüei shaulabü hoba senyühshemlabü; aoyouei BUNYUBOU lamda haoenei hao sanglabü; kaibü maangpon ponpen langkei kitishi!

²⁷Kaodak thonbü pendouei damenlabü hoba BUNYUBOU jungto sepeilabü; hoba phang si chung pendouei hao thedanga lemlabü.

²⁸Aieilausi sangle kho BUNYUBOU shangabü; hoba phangshuong thüka haoei songdakda.

²⁹Haü, kaodaka lilibü shuong pendouei khüpetlabü hoba lemlabü; thamla yeibü pendouei hao junga khüpetlabü; khei jembü lolo langkei akienbü shangakei.

³⁰Loulabü metenei hao khangenlabü; loulabü meten to mütshuongei BUNYUBOU shanga lenlabü.

³¹Hobaje abukko kibü phang to haoeibü khümenbü haoei küma dogo ngekletkulabü.