Read Chang Naga NYENSANG CHIA 27 Bible Online

NYENSANG CHIA 27 - Chang Naga bible

NYENSANG CHIA 27

¹BUNYUBOU kho ngeibü ngesakbü hoba ngeibü khümenbü, ngo ao to hatla? BUNYUBOU ngeibü langkei hau, ngo ao to hatla?

²Amaibü kümbü shuong, ngeibü phe shaula kü jungto loujinei khei ngeibü dangbou shuong, hoba ngeibü labou shuong, haoen phaiyetlabü hoba tuonglabü.

³Lakjaibü dan ngo khulimbo kiasikei, kü maangponei ühütlabü. Ngo khulimbo wapyosuyo longsikei, kheijineikei ngei maanglemlabü.

⁴Ngei BUNYUBOU to denche hia, kho ngei lamlabü, kho ho, kü langkei salang sünga BUNYUBOU chema kian, BUNYUBOU hemaibü chühlabü, hoba haoeibü lembü chema phelabü.

⁵Aieilausi khonsak khonku jihsiphaia haoei ngo haoeibü chemsophanga hulabü hoba haoeibü neichem hushanga haoei ngo hulabü; hoba haoei ngo laangnyudaka tonenlabü.

⁶Hobaje tou ngo kaijembo kibü lakbü shuong thüka ngeibü khu phonlabü; hoba haoeibü neichema olinbü ngühlang yoa lembü kulabü. Ngei chia laulabü, haü, ngei BUNYUBOU to nyensang chia laulabü.

⁷O BUNYUBOU, ngei kaang ngekjinei ditkushi, kü to onoukei, hoba kü to jongaikei.

⁸“Ngeibü thenyek lamashi,” dogo nyi laujinei, “Kaibü thenyek, BUNYUBOU, ngei lambho.”

⁹Kaibü thenyek kü ka tehu, khau angko no khangenbou tüp; no ngeibü thuibou yingko loua, ngo tüp, ayingsi ngo tewailet; O ngo khümenbou Mühghaü.

¹⁰Abou si anyuei ngo inleda. Lausikei BUNYUBOUei ngo tonlabü.

¹¹Hobaje ngeibü dangbou kibü haangjung, O BUNYUBOU, kaibü lamnyu kü la lenbü; hoba ngo pholi lamnyua leishi.

¹²Ngeibü dangbou shuong maangangbü la ngo teku; aieilausi ngo khulimbo amlangbü aukabü shuong, hoba phokai adambo kümbü shuong longakei.

¹³Lang kibü kaodaka BUNYUBOU maibü hapla maialem tegüje ngo semthetkhoulabü.

¹⁴BUNYUBOU shanga haiteiashi, hau kiashi, hoba kaibü maang kaangaitiashi; haü, BUNYUBOU shanga haiyeiashi.