Read Chang Naga NYENSANG CHIA 31 Bible Online

NYENSANG CHIA 31 - Chang Naga bible

NYENSANG CHIA 31

¹Ka to, O BUNYUBOU, ngo huda, ngo ladangkei himou tebauti; kaibü saopobüa ngo khümenashi.

²Kaibü nou kü ae yeiashi, ngo panteiko khümenashi. No kü shanga hau kibü laangnyu, ngo khümenla hau kibü lapheishon che kishi.

³Aieilausi, no ngeibü laangnyu hoba lapheishon; kaibü nyen shanga ngo leishi hoba lam lenshi.

⁴Haoenei kü shanga sung sankubü ka ngo leiyenashi; aieilausi no ngeibü lapheishon.

⁵Kaibü ika ngei ngeibü soushou kuda. Nyi ngo angthetda, O BUNYUBOU, no maanglemenbü Mühghaü.

⁶Kongkongbüa heangsho lembü shuong ngei mangsenda; lausikei ngei BUNYUBOU to mailemda.

⁷Ngeibü maangpon senyühshemlabü hoba kaibü üeisanoua olinlabü; aieilausi nyi ngeibü khonsak hapa, Ngeibü soushou wailetbü thu nyi hapa.

⁸Hobaje nyi ngo dangbou ik to ajinku; nyi ngeibü you ongayasebüa naktikei.

⁹Kü to onoukai, O BUNYUBOU, aieilausi ngo khonkua kia; ngeibü nyek, haü ngeibü soushou hoba ngeibü mangkei maang ngangbüei hau akiko apda.

¹⁰Aieilausi ngeibü langkei maangangbü yoa, hoba ngeibü salang maangpon leilubü yoa dantida; Ngei shedbü haangjung ngeibü hauei atinda, hoba ngeibü lokei makda.

¹¹Ngeibü dangbou pendouei kü la nyikuda, ngeibü lepbü sangmangei hattida. Ngeibü himshuongei hatda, konga aoyouei ngo hapda langjung satda.

¹²Ngo haibü che tegü maangpon ka maan apa; ngo chak leilubü che tegü kia.

¹³Haü, juongei laueibü ngei ditda. Pendou aenei hatlamoklabü ong. Haoenei kü khulimbo huon takda; haoenei ngeibü langkei lela huongda.

¹⁴“Lausikei ngei ka to mailemda O BUNYUBOU, ngei lauda, “No kü Mühghaü.”

¹⁵Ngeibü jihsiphai kaibü ikmaanga kia; ngeibü dangbou ik ka hoba ngo shieinangeibü ka ngo khümenashi.

¹⁶Kaibü thenyek no khangenbou to haukushi; kaibü üeisanoua ngo khümenashi.

¹⁷Ngo himou tebauti, O BUNYUBOU, aieilausi ngei ka to ngaa. Amaibou himou bautishi, haoen Sheol to ngoubü tegü hautishi.

¹⁸Khüpbülangbü sembung kho, laobouei saopobü shuong khulimbo yonglambo, hoba nyikuko lilikhuian ngüh lauda haoen ngoubü la yeitishi.

¹⁹No maibü lai yaangbü, laobou nyi kaibü pisibousi shuong shanga thankuan ki. Laobou müteibü shousi shuong thedanga ka to satetlangbü shuong shanga nyi kümbei.

²⁰Ka junga hushanga müteibü huonsiyou ka nyi ngo hulabü; müteibü sembung wapyobü ka yeme phanga nyi haoen püetan phoda.

²¹BUNYUBOU haübou kishi, aieilausi ngo komlepan kibü sangnyua kijinei haoei kü to haoeibü maangpanglabü üeisanou lena.

²²Ngeije hatbü mokbüa laukei, ka the ka ngo wapan apa; khei yingsikei ngei ka to ngekjinei, ngeibü subüjabü ngühlang nyi ditkei.

²³Kan haoeibü saopobü shuong pendouei BUNYUBOU to sanouashi. BUNYUBOUei mailembü shuong khümenan phoda; lausikei lilisesea kümbüla sopbo ngaitikuda.

²⁴Hau kiashi, hoba maang khaiashi, kan BUNYUBOU to maanglem phobü shuong pendou.