Read Chang Naga NYENSANG CHIA 32 Bible Online

NYENSANG CHIA 32 - Chang Naga bible

NYENSANG CHIA 32

¹Aoei ngühkhüm leilubü shanga ap hapa, aoeibü shabü küplepa; hoba aoeibü shabü küplepbukei haoei haüa.

²Aola BUNYUBOUei shedbü akuda, hoba aoeibü songadoa khüpbülangbü aki, hao haübou.

³Ladang ngei ngeibü shabü angetiko kikei, chaseko ngo wibüei ngeibü mang pheian aptikei.

⁴Aishanga change nangnak kaibü ik kü thüka atsheitham kikei. Ngeibü hau sulanga lembüei linokbü tegü yeitikei.

⁵Ngei ngeibü shabü ka la ngetikei, hoba ngei ngeibü shabü huan apho. Ngei laukei, “Ngei ngühkhüm leilubü BUNYUBOU la thekulabü”; hoba ngeibü shedbü shabü nyi amai apbukei.

⁶Ho shanga Mühghaü to hatbü müt wekoei hao to welautiashi, khonsak jihsiphaia ladang dei yungsen yaang danglaje khübü khoei hao asühlabü.

⁷No hushang, nyi ngo khonsak ka khümenan phoda, khümenbü chiaei nyi ngo kailepda.

⁸Laobou lamnyua no haula kho lamnyu shanga ngei ka la songlen kulabü; ngei ngeibü nyek ka to phoan songlenlabü.

⁹Ditenlabü songsido akibü koli ayingsi gadu tegü kan teki; ao leiyeibü janglüh hoba sembunga membü namlühei senetjan; khei ayinglonga haoen ka to anyilabü.

¹⁰Amaibou shanga maangshat juong kia; lausikei aoei BUNYUBOU to mailemda, üeisanouei hao kailepda.

¹¹Kan saopobü shuongei BUNYUBOU to maang haiashi hoba olinashi. Hobaje kan maangpon tangbü shuongei olinbüei ngekashi.