Read Chang Naga NYENSANG CHIA 34 Bible Online

NYENSANG CHIA 34 - Chang Naga bible

NYENSANG CHIA 34

¹Ngei jihsiphai pendoua BUNYUBOU sanglabü; hao nyen sangbü kü sembunga ponpen kilabü.

²Kü soushouei BUNYUBOUa the lenenlabü; khonkubü shuongei kho ditashi hoba olinashi.

³Kü yoa BUNYUBOU soneikangtiashi, hoba senei liko hao nyen soneikangtikho.

⁴Ngei BUNYUBOU lambei hoba haoei kü to jongaikei, hoba ngo hatbümokbü pendou ka haoei ngo khümenkei.

⁵Hao to chühashi hoba ngesakko kishi, hoba kaneibü thenyek ladangkei himouko akilabü.

⁶Ho shalebou mütei ngekkei hoba BUNYUBOUei kho ditkei; hoba haoeibü khonsak pendou ka khümenkei.

⁷Aoyouei BUNYUBOU to hatda haoen kaijembo BUNYUBOUeibü hangangbü kida, hoba haoen khümenda.

⁸O BUNYUBOU maiakei dogo sean chühashi hoba ngeashi; aoei hao to satenda haoei haüa.

⁹Kan haoeibü saopobü shuongei BUNYUBOU to soumo hatashi; aieilausi aoyouei hao to hatda haoen sha aleda.

¹⁰Molosaonyu shoushouei wida, hoba mühei phamda; lausikei aoyouei BUNYUBOU lamda haoen maibü aieikei akonglabü.

¹¹Kaiya, O nashousi shuong, kü to ditashi, ngei ka la BUNYUBOU to hatbü lenkho.

¹²Kümsilei maibü hapla shanga aoei langkei mangsühda, hoba salangko kimangsühda?

¹³Kaibü lishang amaibü ka senetashi, hoba kaibü sembung yepeijawebü ka senetashi.

¹⁴Amaibü ka bangashi hoba maibü kümashi; Sangmai lamashi, hoba kho shiashi.

¹⁵BUNYUBOUeibü nyek saopobü aenei kia, hoba haoenei ngekbüa haoeibü nou haangakei.

¹⁶Aoyouei amaibü kümda haoen damenbü kaodak ka wapan apla shanga BUNYUBOU thenyek haoen khulimbo kia.

¹⁷Saopobü mütei ngekjinei BUNYUBOUei ditda. hoba haoeneibü khonsak pendoua haoen khümenda.

¹⁸Aoyou maangpon leilubüa ki haoen nyangko BUNYUBOU kia, hoba soushoua tangan kibü khümenda.

¹⁹Saopobü müt khonsak juongnyu kia; lausikei BUNYUBOUei khübü pendou ka hao khümenda.

²⁰Haoei haoeibü lo pendou lomda; khübü yoa che ongkei aleiluda.

²¹Shabüei amaibü haitilabü; hoba aoyouei saopobü shuong mangsenlaje haoen la shedbü kulabü.

²²BUNYUBOUei hao khangenbü shuong soushou püetda; hoba aoyouei hao to satetlanglaje, haoen aolakei shed akulabü.