Read Chang Naga NYENSANG CHIA 35 Bible Online

NYENSANG CHIA 35 - Chang Naga bible

NYENSANG CHIA 35

¹O BUNYUBOU, aoyouei kü to tokyoda, nyi haoen to tokyoashi; aoyouei ngo khulimbo wapyoda haoen to nyikei wapyoashi.

²Püetbü aih hoba kakan apbü aih jungashi; hoba ngeibü thuibü shanga laushi.

³Kaibü aubu setenashi hoba aoyouei ngo shieida haoeneibü lam thangetashi. Ngei no khümenkei, dogo kü soushou to lenshi.

⁴Aoyouei kü langkei lamda haoen himou bautiashi hoba soumo akiko aptishi; aoyouei ngo khonkutila huon lamda haoen namjak sepeitishi hoba mangtishi.

⁵Hobaje BUNYUBOU hangangbüei shian sattiko, haoen yeiei soulangbü youshou sho tegü kitishi.

⁶Hobaje BUNYUBOU hangangbüei shieitiko, haoeneibü lamnyu nakthühbü hoba shekshektham kitishi.

⁷Aieilausi ai ayingnyu haoenei kü shanga haoeneibü sung püngkhüna sankuda; ai ayingnyu haoenei ngeibü langkei shanga püngkhün che thukei.

⁸Angeko hao jungto maubü loutishi; hoba sung laubou kü shanga sankukei khonei haoen mintiashi; hao maulabü khünei attiashi.

⁹Hobaje kü langkei BUNYUBOUa olinlabü; haoeibü khümenbüa olinlabü.

¹⁰Ngeibü lo pendouei laulabü, “BUNYUBOU no phatbü ao ki. Aoei hau akibü hao shanga yongko hau kibü müt ka khümenda; haü, hau akibü hoba shalebü hao ka soshau soyungbü müt ka khümenda?”

¹¹Ngühmaang alanbü aukabü shuong tangto loushetda; ngei ai ange, khübü shanga haoenei kü to pheda.

¹²Haoenei kü la maibü jeiko amaibü jongsak kuda; hoba kü soushou semlepda.

¹³Lausikei haoen shatjinei ngei senounei neikei. ngo kü langkei nyengbüei khonkukei; hoba ngeibü khu khukhu to khüpjung kouan welaukei.

¹⁴Kü thangbou ayingsi ngeibü jaisina tegü ngei jongaikei; jembüeibü nyu haian manghaapbü tegü ngo mang haapbo khüpetkei.

¹⁵Lausikei ladang ngo phaiyetkei, haoen olinyokei hoba haoen liko kamshaikei! Youei ikei abenbü shuong ngo khulimbo takshatkei hoba ngei kho ange; haoenei ngo athakko jitnyinkei.

¹⁶Lemalanga asaopobü nyikulabü shuong tegü, haoenei kü la hauh uyoan lenkei.

¹⁷BUNYUBOU, nyi lalokche chühko kila? Haoenei leilutibü ka ngeibü langkei khümenashi. Molosaonyu ka ngeibü langkei khümenashi.

¹⁸Shuongsiphang yaangbü yoa ngei no sangkho, müt juong yoa ngei no sangkho.

¹⁹Aoyou amlangbüa ngeibü dangbou shuong ki haoen kü thüka tüolinti; ayingsi ai ayingnyu aoyouei ngo mangsenda, haoenei kü to nyek to teshattiku.

²⁰Aieilausi haoenei sangmai shanga alauda; lausikei kaonyua kibü aoyou ea aoa ki haoen khulimbo haoenei khüpsilang ngüh lamleda.

²¹Haü, haoenei ngo khulimbo haoeneibü sembung yaang kaakei. Haoenei laukei, “Aha! Aha! küneibü nyekei kho hapa.”

²²Nyi kho hapa, O BUNYUBOU, litham teki; O BUNYUBOU, kü ka bangan teki.

²³No topeiashi, hoba kü la mat maitikula shanga, ngeibü Mühghaü hoba ngeibü BUNYUBOU. Kü shanga sulajala shanga phühenashi.

²⁴Kaibü saopobü thüng, O BUNYUBOU ngeibü Mühghaü, kü mat jemashi hoba haoen kü thüka tüolinti.

²⁵Haoenei haoeneibü maangpona, “Aha, künei mangsühbü hapa. Künei hao suia,” dogo telauti.

²⁶Aoyouei ngeibü khonku thüka olinyoda haoen liko himou bautiashi hoba phenyemtiashi. Aoyouei ngo khulimbo nyenhang hapbei haoen himou hoba the khümbüei hele letishi.

²⁷Ngeibü ngühmai kümaleia aoyou olinda haoen olinbüei ngektiashi hoba olinko kitiashi. Haü haoenei athakko lautishi, “BUNYUBOU, ao jembü khangenbü naang maitibüa olinda hao athakko sangashi.”

²⁸Hobaje chalou sünga ngeibü lishangei kaibü saopobü, hoba kaibü nyensang shanga laulabü.