Read Chang Naga NYENSANG CHIA 36 Bible Online

NYENSANG CHIA 36 - Chang Naga bible

NYENSANG CHIA 36

¹Haoeibü maangpon maangkabou to atan shedshonbüei amaibou shuong to joyoda, Mühghaü to hatbü hao thedanga aki.

²Aieilausi haoeibü shedbü ühüplabü hoba kho jembü thedanga sangda.

³Haoeibü ngühang shedbü hoba khüpbülangbü; songsido kiko kümbü hoba maibü kümbü ka hao nanga.

⁴Haoei jembü shena shedbü huon takda; haoei amaibü to amangsenda.

⁵O BUNYUBOU, kaibü üeisanou müh sühko angakei, nyi maang lemenbüei sangmei onlangda.

⁶Kaibü saopobü shongh tegü kia; kaibü matjem aeibou haükei. O BUNYUBOU, nyi müt si meisiau khümenda.

⁷O Mühghaü, kaibü üeisanou lai namsek ki; hoba khunakshousiei kaibü yemekoubü kaakphanga satenda.

⁸Kaibü chem haabüei haoen aeibou senyühshemlabü; hoba no senyühshembü shumang ka nyi haoen la yungtilabü.

⁹Aieilausi ka to langkei pakshang kia; kaibü ngesakbüa künei ngesak hapda.

¹⁰Aoyouei no ngekei haoen shanga kaibü üeisanou tenang; maangpon saopobü shuong shanga kaibü khümenbü tenang.

¹¹Yonglam lilibü you ngo khulimbo telouti; hoba amaibü ikei ngo shian tesatti.

¹²Shedbü kümbü shuong tuongakei; haoen phetetakei hoba pila athüklabü.