Read Chang Naga NYENSANG CHIA 37 Bible Online

NYENSANG CHIA 37 - Chang Naga bible

NYENSANG CHIA 37

¹Amaibü shuong kibü shangaje no tenyamnyam; ayingsi aoyouei asaopobü kümda hao to maang tedüh.

²Aieilausi lalok akiko kho sang tegü wapan aplabü, hoba kesiong alibü tegü linoktham aplabü.

³BUNYUBOU to mailemashi; Khei yinga longa no kaodaka haangkhu onko kilabü.

⁴BUNYUBOU to olinashi, hoba haoei kaibü maangponei mangsühbü kulabü.

⁵Kaibü kümaleia BUNYUBOU maang haitiashi; tokei hao to mailemashi hoba haoei kho haüthüktikulabü.

⁶Hobaje haoei kaibü matmaibü ngesak tegü longtilabü, hoba kaibü ngühmai chalou chajih tegü yeitilabü.

⁷BUNYUBOU thedanga ea aoa kishi, hoba hao shanga natenko haiyeishi; aoei jembü lama naangmaida, aoei amaibü huonsiyou haüthüktila sungbada hao shanga no tenyamnyam.

⁸Khauang maangpok ka thakashi hoba khauang apyoashi; tenyamnyam, khoei amaibü to ong leida.

⁹Aieilausi amaibü kümbü shuong wapan aplabü; lausikei aoyouei BUNYUBOU haiyeilaje, haoenei kaodak phet phanlabü.

¹⁰Aieilausi longche ong kianje amaibü akilabü, nyi hao kishang to maisho chühshi, hao khünei akilabü.

¹¹Lausikei ea aoabüei kaodak phet phanlabü; hoba sangmai yaangbüa haoen olinyolabü.

¹²Amaibüei ngühmaang lanbou khulimbo huon takda; hoba hao la hau uan lenda.

¹³BUNYUBOUei hao la nyikulabü; aieilausi haoei haoeibü chalou louada dogo ngeda.

¹⁴Shalebü si khambü senyanla shanga, hoba aoyoueibü kümsilei tangbü ki haoen haitila shanga amaibouei in setena, hoba haoeneibü bulau büha.

¹⁵Haoen haoeneibü inei hailabü; hoba haoeneibü bulau pakngoklabü.

¹⁶Amaibouei juong kibü toje, saopobouei shisho kibü kho khaibou.

¹⁷Aishanga amaibüeibü ik leilulabü; lausikei BUNYUBOUei saopobü kho senetda.

¹⁸BUNYUBOUei shedbü akibü müteibü chalou ngekei; hoba haoeneibü phet thon akiko kilabü.

¹⁹Amaibü chaloua haoen himou abautilabü; hoba mühanoua haoen senyühshemtilabü.

²⁰Lausikei amaibou maulabü, hoba BUNYUBOU khulimbü shuong yamsang chipen tegü mautilabü; wan thüka haoen maulabü.

²¹Amaibouei lotda hoba akungaida; lausikei saopobü mütei maangnyu angko jungeida hoba kuda.

²²Aishanga aoyou haoei haükuda haoenei kaodak phet phanlabü; hoba aoyou to haoei khükda uokda haoen wapan aplabü.

²³Müt cheeibü youmo shuong kho BUNYUBOU ka ki, hoba haoeibü lamnyua haoei olinda.

²⁴Hao tuongsikei hangkosuko atuonglabü; aishanga BUNYUBOUei jembü ikei hao senetlabü.

²⁵Ngo heshou kikei hoba tou baushi, khei yingasikei saopobü inletbü, ayingsi haoeibü lilabüei hishau hiyungbü ngei ühüp.

²⁶Chalou sünga haoei onouko jungeida hoba lotkuda; hoba haoeibü lilabü haükuda.

²⁷Amaibü ka bangashi hoba maibü kümashi; hoba no thon akiko kilabü.

²⁸Aishanga BUNYUBOUei ngühmai sanouda; hoba haoei saopobü üpyoda; Haoen thon akiko khümenan phokuda; lausikei amaibü lilabüje wapan aplabü.

²⁹Saopobü mütei kaonyu kho phet phanlabü; hoba thon akiko khünei kilabü.

³⁰Saopobü müteibü sembungei songbüdobü ngüh lauda.

³¹Haoeibü Mühghaü ngühkhüm haoeibü maangpona kia, haoeibü younak che ongkei asheklabü.

³²Amaibüei saopobü müt pheiyeida, hoba hao haitila lamda.

³³BUNYUBOUei haoeibü ika hao üpyolabü, ayingsi hao matjemjinei hao ayuktilabü.

³⁴BUNYUBOU shanga haiyeiashi hoba haoeibü lamnyua kishi, hoba kaodak phet kho phanla haoei no yaangentilabü. Ladang amaibou wapan aplaje nyi kho haplabü.

³⁵Ngei amaibou kho hau yaangbüa jembü lolo Lebanon bunyu tegü ik hakyohakyo kouan hapbei.

³⁶Lausikei hao danjung haukei hoba chühashi, hao akitei. haü ngei hao lambei lausikei hao ühüp.

³⁷Benbüsoubü müt chühletashi, hoba tangbü müt to chühshi. Aieilausi sangsembü müt shanga shisishousi kia.

³⁸Ngühkhüm leilubü shuong lepde mautilabü, hoba haoeneibü shisishousi wapan aplabü.

³⁹Lausikei saopobü müt khümenbü BUNYUBOU ki, khonsak khonku jihsiphaia hao haoeneibü lapheishon.

⁴⁰Hobaje BUNYUBOUei haoen to thuida hoba senetda; haoei haoen amaibou ka senetda hoba haoen khümenda, aieilausi haoen hao to satetlangkei.