Read Chang Naga NYENSANG CHIA 38 Bible Online

NYENSANG CHIA 38 - Chang Naga bible

NYENSANG CHIA 38

¹O BUNYUBOU, no khauangko nyi kü to tühak; ayingsi no maangshat angko ngo teshitenangei.

²Aieilausi kaibü laujin kü to kaangko ngüttikuda; hoba kaibü ikei kü to kaangko nyatlepda.

³Kaibü khauang maangpokei ngeibü phea ai maibü aki; ayingsi ngeibü saüsimaü kibü haangjung ngeibü loa hakso aki.

⁴Aieilausi ngeibü shedbü ngeibü khu to anga; on atsheibü tegü haoen kü shanga yongko atsheia.

⁵Ngo ngoubüloubü haangjung, ngeibü mou mangsenlabüje amaibü ki.

⁶Ngo aeibou khonkhuda hoba khüpjung kouda; chalou sünga ngo mang haapda.

⁷Aieilausi ngeibü shenjang aujiauda; hoba ngeibü phea maibü aki.

⁸Ngo semthetda hoba netla maimai yeiakei; ngeibü maangpon hak asoenbü haangjung ngo wida.

⁹BUNYUBOU, ngeibü maangdüh pendou ka junga kia, hoba ngo wibü ka junga huan aki.

¹⁰Ngeibü maangpon toktokda, ngo hau akiko apa; ngeibü nyek ka ngesakbü sada.

¹¹Kü thangbou shuong hoba ngeibü maangjambou shuong ngeibü khonsak ka kukan loda; hoba chempenkei kukan loda.

¹²Tokei aoyouei ngeibü langkei lamda haoenei ngo mintila sung sanda; hoba aoyouei ngo amaila lamda haoenei ngüh amaibü lauda. Hobaje chaseko khüpbülangbü songsido daman chühda.

¹³Lausikei ngo obangbü müt tegü aditda; hoba ngo likhipbü müt tegü ki.

¹⁴Haü, ngo aditbü müt tegü, hoba sembunga haklabü akibü müt tegü ki.

¹⁵Lausikei O BUNYUBOU, ngei ka to maanglemda; O BUNYUBOU ngeibü Mühghaü, nyi jongailabü.

¹⁶Khei ayinglonga haoenei kü thüka olinlabü. Ladang ngeibü you sheketlaje, Haoenei ngo khulimbo yaangan lenlabü dogo ngei lauda.

¹⁷Aieilausi ngo tuonglabü lele ong kia, hoba ngeibü maangmau kü thedanga kia.

¹⁸Aieilausi ngei ngeibü shedbü thekuda; ngo ngeibü shabü shanga maangmauko shatda.

¹⁹Aieilausi ngeibü dangbou pianleman hau kia; hoba kü to ayingbüa mangsenbü shuong haada.

²⁰Tokei aoyouei maibü jeiko amaibü kungaida. haoen ngeibü dangbou ki, aieilausi ai maibü ki kho phai ngo semda.

²¹O BUNYUBOU, ngo tüpyo O ngeibü Mühghaü, ngo nyangko kishi!

²²O BUNYUBOU, ngo khümenbou, kü to thuila panteiashi!