Read Chang Naga NYENSANG CHIA 40 Bible Online

NYENSANG CHIA 40 - Chang Naga bible

NYENSANG CHIA 40

¹Ngei BUNYUBOU shanga natenko haiyeikei, hoba haoei kü ae nou haangkei hoba ngei ngekbü ditkei.

²Haoei ngo hatlamoklabü püngkhün thim ka senenkei; hoba haoei ngeibü you laangnyu thüka lotikei, hoba ngeibü youyaü khümenan phokei.

³Haoei ngeibü sembunga chia haanbü che, khei seneibü Mühghaü shanga nyensanglabü che jinkukei. Juongei kho haplabü hoba hatlabü; hoba BUNYUBOU to maanglemlabü.

⁴Aoei BUNYUBOU to haoeibü maanglem yeitida, hoba lilibü ayingsi amlangbü mühghaü ae sepeisaibü aweeida, haoei haüa.

⁵O BUNYUBOU, ngeibü Mühghaü, nyi kümbü maangpanglabü kümsilei, hoba nyi kün aedang to dambü juong kia; ka to takteilabü lubü ao aki. Ngei khübü shanga ngetila hoba lenlabü che tegüje, khübü kho awekhümbo juongsepan kilabü.

⁶Lembü hoba lemlabü peisileia no aolinda, ngeibü nou nyi ipbua; nyi juokbü lembü hoba shabü lembü ahi.

⁷Kheijinei ngei laukei, “Chühashi, ngo louada, Ngühkhüm lea kü shangabü ho doan kia.

⁸O ngeibü Mühghaü, nyi maangangbü kümla ngo olinda; haü, kaibü ngühkhüm ngeibü maangpon maangkaboua kia.”

⁹Shuong yaangbü thedanga ngei kaibü saopobü shanga ngetia; chühashi, ngei ngeibü sembung khop asenetlabü. O BUNYUBOU; kho nyi ngekei.

¹⁰Ngei kaibü saopobü ngeibü maangpon maangkaboua huan apho; kaibü mailemenbü hoba kaibü khümenbü ngei ngetia. Shuong yaangbü ka ngei kaibü üeisanou hoba kaibü ngühmai huan apho.

¹¹O BUNYUBOU, kaibü üeisanou kü ka tesenet; kaibü üeisanou hoba kaibü ngühmaiei ngo athakko senetan phoshi!

¹²Aieilausi aweenbü amaibüei ngo komlepa, ngeibü shedbü lapheda, hibü ngei chühyoan akhüpenda; haoen ngeibü khua khulou tokei juongbou hoba ngeibü maangpon akiko apa.

¹³O BUNYUBOU, sanoudambo ngo khümenshi; O BUNYUBOU kü to thuila panteiashi.

¹⁴Aoyouei ngeibü langkei mautila lamda haoen liko himou bautishi hoba mangtiashi. Aoyouei ngo khonkutila maangtakda haoen phaiyettishi hoba soumo akiko aptishi.

¹⁵“Aha! Aha!” dogo aoyouei kü to lauda, haoen himouei sangliphang la yeitishi.

¹⁶Aoyouei no lamda haoen pendou ka to maangshikko olintiashi; “BUNYUBOU yaangentiashi,” dogo kaibü khümenbü sanoubü shuongei athakko lautishi!

¹⁷Lausikei ngo shaleda hoba khamda; khei yingsikei BUNYUBOUei kü shanga dambuda. No kü to thuibou hoba khümenbou, O ngeibü Mühghaü, phaiko teki.