Read Chang Naga NYENSANG CHIA 41 Bible Online

NYENSANG CHIA 41 - Chang Naga bible

NYENSANG CHIA 41

¹Aoei shalebü shanga dambuda hao haübou. Amaibü chaloua BUNYUBOUei hao khümenlabü.

²BUNYUBOUei hao senetda hoba haoeibü langkei phokuda hoba kaodaka hao haübou dogo lauda; hoba haoeibü dangbouei maangangbü la nyi hao akuda.

³BUNYUBOUei hao shatbü yepshanga thuilabü; hao shatjinei nyi haoeibü shatsinyat pendou maitida.

⁴Ngei laukei, “O BUNYUBOU, kü to sanoukai, ngeibü langkei maitishi, aieilausi ngei no khulimbo shabü shona.”

⁵Ngeibü dangbou shuongei ngo khulimbo joyoko lauda, “Hao ladang haila hoba haoeibü nyen ladang maula?”

⁶Hobaje at ngo peanchühla loualonga haoei yonglam lilibü ngüh lauda; haoeibü maangpona shedbü thansheida, ladang hao khongto hauda haoei kho lauda.

⁷Aoyouei kü to mangsenda haoen pendouei ngo khulimbo nyamnyamda.

⁸“Shatsinyat amaibü che hao to kaangko bauan kia hoba tou hao yepakei, touje hao apienlabü” dogo haoenei lauda.

⁹Haü, ngeibü lamshuok thangbou ao to ngei maanglembei, aoei ngeibü wentek shaukei, haoei ngo khulimbo haoeibü you yaüenkei.

¹⁰Lausikei O BUNYUBOU, nyi kü to onoukai hoba haoen to phoklamlabü lele ngo phonkai.

¹¹Hoei nyi kü to sanouda dogo ngei ngekei; aieilausi ngeibü dangbouei kü thüka thük ühüpda.

¹²Lausikei kü shangaje ngo tangan kibü shanga ong nyi kü to thuida; hoba thon akiko nyi ngo ka thedanga phokukei.

¹³Thonbü thakbü akibü Israel Mühghaü BUNYUBOU haübou yingshi. Amen! hoba Amen!