Read Chang Naga NYENSANG CHIA 45 Bible Online

NYENSANG CHIA 45 - Chang Naga bible

NYENSANG CHIA 45

¹Ngühkung maibü cheei ngeibü maangpon sopbo kia; Choba shanga ngei ai chia atkuda. Ngeibü lishang iksepbo dobü dojin tegü ki.

²Müteibü shousi shuong yoa no hemaibou; kaibü sembung khopa onou jinkuan kia; hibü Mühghaüei kaibü langkei thon akiko haükua.

³O yaangenbou, kaibü in kaibü mepoua shouashi, kaibü soneikangbü hoba songdak thükbü yingshi.

⁴Ngühmai hoba ea aoabü hoba saopobü shanga kaibü yaangenbü soumoa thük hapbo setan haushi; hoba kaibü mae ikei ka la hatlamoklabü kümsilei shanga lenashi!

⁵Chobaeibü dangbou maangpona kaibü laujin akbü kia; ka phanga phangshuong tuongda.

⁶Kaibü Choba setshang, O Mühghaü ponpen thon akiko kia; kaibü Chobaeibü julo kho thenyek achühbü julo ki.

⁷Nyi saopobü sanouda hoba amaibü mangsenda; hibü Mühghaüei, ka Mühghaüei, kaibü mütli to liman olinbü onangei ka to naangkukei.

⁸Kaibü neisimei pendoua ponlem hibü hoba alo si kasia ponlem hida; thunyu hauhei kümbü Chobaeibü chem kongkinei no olintida.

⁹Kaibü yaangenbü sao shuong yoa Chobaeibü nouyangnyu shuong yoan kia; kaibü mae aenei offir hon hele lebü Choba sao loda.

¹⁰Ditashi, O nouyangnyu, hoba damanchühashi hoba kaibü nou haangashi; kaibü mütli hoba kaibü chempenkei maan apashi.

¹¹Kheijinei Chobaei kaibü hemaibü mangsühlabü; hao kaibü BUNYUBOU yingsije, nyi hao to lemashi.

¹²Hobaje Tair nouyangnyu jongsak junganyu no suletlabü; mütshuong yoa keibüeikei kaibü üeisanou sulajalabü.

¹³Chobaeibü chem maanga kibü Chobaeibü nouyangnyu soneikangko kia; saoeibü neisimei kho honeibü leiei shuian takkei.

¹⁴Soneikangbü neisimeia sao Choba jungto leian hauda; sao hangnyu saoeibü nouyangnyu saosüngbü medei shuong ka jungto leian loulabü.

¹⁵Haoen Chobaeibü chem to atjinei olinbü maanghaibüa haoen leian hauda.

¹⁶Kanei boushuong jeiko kaneibü shousishuong kaodak pendoua Choba pentilabü.

¹⁷Meten pendoua ngei kaibü nyen damentilabü; hibü phangshuongei ponpen thon akiko ka la nyensang kulabü.