Read Chang Naga NYENSANG CHIA 49 Bible Online

NYENSANG CHIA 49 - Chang Naga bible

NYENSANG CHIA 49

¹Hanbü yaangbü hamei keibü si shalebü hamei,

²phangshuong pendouei ho ditashi; kaodaka kibü pendouei nou haangashi.

³Ngeibü sembungei songbüdobü ngüh laulabü; hoba ngeibü maangpon damanchühbüa ditenbü kilabü.

⁴Tetbütabü ngühli chenei ngei ngeibü nou haanglabü; ngei aditenbü ngüh ngei kongkina wanenlabü.

⁵Hibü aoyouei jembü keisiyaang to maanglemda, hoba haoen nyaksinam kibü shanga the lenenda;

⁶hoba ngeibü dangbou shuong laobou shedbüei ngo kailepda khübü amaibü chaloua ngo aila hatla?

⁷Ponpen langkei kilabü lele, leilubü ühüplabü lele;

⁸haoen aoeikei jembü jaisina üangtheten, ayingsi Mühghaü la haoei muthüng akuen.

⁹Aieilausi haoeneibü langkei muthüng munam yaang. hoba ponpen shanga khei phokujan!

¹⁰Aieilausi songsido kibü müt haida, ngoubü hoba songsido akibü liko mauda. hoba haoeneibü nyaksinam pendou shilashoula apyokuda.

¹¹haoeneibü chem athakko ponpen kilabü, hoba haoeneibü kishang meten pendou shanga kilabü dogo haoeneibü maanga damanchühda; haoenei haoeneibü kao la jembü nyen nyenkuda.

¹²Lausikei mütei ditenbü aki, hao maulabü meisiau tegü ki.

¹³Jembü to maang lemngaibü shuong thu ho ki: hoba haoen tegübü mütei haoenei laubü sungletda.

¹⁴San tegü haoen Sheol shanga lamlean kia; haibü kho haoeneibü sanlombou kilabü. Hobaje ngeyang tangbü mütei haoen thüka leiyeilabü; hoba haoen hemaibü kishang akiko Sheolei mautilabü lele kilabü.

¹⁵Lausikei Mühghaüei ngeibü soushou Sheol sei ka angngailabü; aieilausi haoei ngo sungletlabü.

¹⁶Ladang müt keilaje, ladang haoeibü chem soumo yaang yeilaje, no hatko teki,

¹⁷aieilausi hao ladang hailaje haoei ai akünlanglabü, haoeibü soumo hao phai to ayanlabü.

¹⁸Langkei kibü shanga hao olinasikei, hoba kümsilei pendou hao yoa maisho hauda dogo haoei jembü lolo sangasikei,

¹⁹hao jembü pisibousi shuong meten yoa yojan; haoei touje ngesakbü ladangkei ühüplabü.

²⁰Müt che ao tükdebü müt ki, hoba ditenbü aki, hao maulabü meisiau phatko ki.