Read Chang Naga NYENSANG CHIA 50 Bible Online

NYENSANG CHIA 50 - Chang Naga bible

NYENSANG CHIA 50

¹Mühghaüei ong khei, BUNYUBOUei ong laua, hoba chaang ka chanep sühko kaodak ngakei.

²Hemaibü penbüsoubü Zion ka Mühghaüei ngesaktikei.

³Seneibü Mühghaü loulabü hoba ngüh üangko akilabü. hao thedanga wanei lonkhümlabü; hoba hao kaijembo yeinak aeibou kilabü.

⁴Haoei jembü mütli matjemla shanga haoei thükaenei mühshuong to hoba kao to ngalabü:

⁵“Ngeibü saopobü shuong aoyouei lembüsabü danko kü yoa thebülanbü küma haoen kü jungto liko leisheiashi.”

⁶Müh shuongei haoeibü saopobü ngetilabü, aieilausi Mühghaü jembü lolo matjembou ki.

⁷Ditashi, O kü mütli ngei joyokho, O Israel ngei ka la aukabü kukho; ngo Mühghaü, kaibü Mühghaü.

⁸Kaibü lembü shanga ngei ka to ühaklabü; aieilausi kaibü juokbü lembü athakko kü thedanga kia.

⁹Kaibü chem ka ngei masu pongsu alelabü, hoba kaibü lonchem ka lon paang alelabü.

¹⁰Aieilausi yama kibü meisiau pendou, hoba shongh hajar thüka kibü masu pendou ngeibü.

¹¹Shongha kibü au pendou ngei ngekei, hoba yama kibü meisiau pendou ngeibü.

¹²“Ngo mühei haiko kia tegükei ngei ka to telenkhoulabü; aieilausi kaodak hoba khünei shenko kibü kho ngeibü ki.

¹³Ngei masu pongsu phe shaulep lo?

¹⁴Olinbü lembü Mühghaü la kuashi, hoba kaibü thebülanbü Thükkabou la kuashi.

¹⁵Hobaje khonsakbü chaloua kü to ngaashi; ngei no khümenlabü hoba nyi ngo soneikangtilabü.”

¹⁶Lausikei amaibou to Mühghaüei lauda, “Aishanga ngei khümenbü ngühkhüm ngetikei, hoba ngeibü thebülanbü ka sembunga ainyula laueila?

¹⁷Aieilausi nyi lenbü mangsenda, hoba ngeibü ngüh ka phainei apda.

¹⁸Ladang nyi kokbü che hapbei hao to hehoat kikei; hoba asangalanbü to phejan janyobü yeikei.

¹⁹“Nyi kaibü sembung amaibou la kukei, hoba kaibü lishangei khüpbülangbü kümda.

²⁰No setda hoba kaibü jaisina khulimbo laueida; nyi kanyueibü jayangshou aweasüngko laueida.

²¹Khübü kho nyi küma hoba kho ngüh üangko kikei; nyi ngo no tegü ong dambei. Ngei no maang yaangtikho hoba kho ka thedanga phokukho.

²²“Kan ngo wela alebü shuongei ho ngeashi, khei ayinglonga ngei kan netla yeitilabü, hoba kan khümenla aokei akilabü.

²³Aoyouei olinbü lembü kuda haoenei ngo soneikangtida; hoba aoei jembü kümaleia maangsanglaje, hao la ngei Mühghaü khümenbü lenlabü.”