Read Chang Naga NYENSANG CHIA 51 Bible Online

NYENSANG CHIA 51 - Chang Naga bible

NYENSANG CHIA 51

¹O Mühghaü, kaibü üeisanou thüng kü to onoukai. Kaibü üeisanou apsilebü thüng kü la ngühkhüm lulimbü shedbü apbushi.

²Ngeibü shedbü ka lemai lela sakkushi, hoba ngeibü shabü ka ngo saüenkushi!

³Aieilausi ngei ngühkhüm lulimbü shedbü thekuda; hoba ngeibü shabü ponpen kü thedanga kia.

⁴Nyi laujinei no mat mailabü lele kisije, hoba kaibü matjem hinseian kisije. No khulimbo, no khulimbo maimai ngei shabü shona, hoba ka thedanga ai amaibü ki kho küma.

⁵Chühashi, ngo shedbüa bukkei; hoba shabüa ngo künyuei shia künkei.

⁶Chühashi, nyi maangaenei ngühmai mangsühda; hoba huphanga nyi kü la songsido ngetilabü.

⁷Hisopei ngo saüenkushi hoba ngo hinseian kilabü; ngo sakkushi hoba ngo ninthu tokei thupaibou kilabü.

⁸Nyi leilutikubü loei olinlabü lele, kü la maangshikbü hoba olinbü dittiashi.

⁹Ngeibü shabü ka kaibü thenyek huashi, hoba ngeibü shedbü pendou apbushi.

¹⁰O Mühghaü, kü to maangpon hinseibü pakentiashi, hoba kü la tükdebü soushou haanbü che jinkushi.

¹¹Kathedang ka ngo tüp; hoba kaibü Soushou Saopobü kü ka tengailang.

¹²Kaibü khümenbü olinbü kü jungto longeitishi; hoba dongebü soushouei ngo senetshi.

¹³Kheijinei ngühkhüm lulimbü to ngei kaibü lamnyu lenlabü. hoba shabü shuong ka jungto maangpon sepeilabü.

¹⁴O Mühghaü, no ngo khümenbü Mühghaü, sii phinbü shedbü ka nyi ngo khümenashi; hoba ngeibü lishangei kaibü saopobü shanga hau pendouei chia laulabü.

¹⁵O BUNYUBOU, nyi ngeibü sembung khop ipbushi, hoba ngeibü sembungei kaibü nyensang lenlabü.

¹⁶Aieilausi nyi lembüsabüa aolinda; tegüje ngei kukhoulabü. Nyi juokbü lembüa aolinda.

¹⁷Maangpon leilubü kho Mühghaü to lembüsabü ki; O Mühghaü, maangpon leilubü hoba maangpon sepeibü nyi awealauko aki.

¹⁸Nyi maangangbü tegü Zion to maibü kümashi; nyi Jerusalem banyu leashi.

¹⁹Kheijinei saopobü lembüsabüa juokbü hoba pemtou juokbülembüa no olinlabü; kheijinei haoenei kaibü lembüsabü lemshona masu pongsuei lemlasalabü.