Read Chang Naga NYENSANG CHIA 55 Bible Online

NYENSANG CHIA 55 - Chang Naga bible

NYENSANG CHIA 55

¹O Mühghaü, ngeibü welau to nou haangbü; hoba ngei subüjabü ka no tehu!

²Kü to ngüha lekai, hoba kü to jongaishi, ngeibü khonsak hoba wibü ka ngo hakso aki.

³Dangbou shuongeibü ngühlang kibüei, hoba amaibüei shieikoebü ka, haoenei kü la shedbü onat jinkuda, hoba khauangbüa haoenei ngo shieikoeda.

⁴Ngeibü maangpon aeibou khonkuda; hoba hailabü hatlabü kü to sühda.

⁵Hatlabü hoba lühbü kü to sühakei; hoba kongbüei ngo süha.

⁶Hobaje ngei laukei, “Oh, ngo dukutuk tegü kaak yemmang sühnyu!” Kheijinei ngo pijung haulabü hoba haksoko kilabü.

⁷Chühashi, kheijinei ngo saabüa seengeilabü; ngo yama kilabü.

⁸Yeithu yeinak hoba yeishik ka ngo tongde hushang to haulabü.

⁹Oh, BUNYUBOU, panglangtiashi hoba haoen ngüh janyinkushi; aieilausi sangnyu khünei ngei kaangbüsekbü kümsilei hoba wapyobü hapa!

¹⁰Change nangnak haoenei sangnyu banyu kho kailepda, maanga shabü hoba amaibü kia.

¹¹Kho maanga amaibü kümbü kia, khonkutibü hoba khüpbülangbü kümsilei kho khongnyu ka asatda.

¹²Aieilausi dangbouei kü to nyikukei aying tegüje ngei natenkhoulabü.

¹³Lausikei no kho kü maangjambou, kü thangbou hoba ngo ngeyobü thangbou.

¹⁴Sen liko ngühthang yenan paplepshoule kikei; sen liko Mühghaü chem to paikei.

¹⁵Haoen jungto mangde haibü loutishi, püngkhün to haoeneibü langkei attishi; aieilausi amaibü haoeneibü maanga jembü thüngshanga kia.

¹⁶Lausikei ngeije Mühghaü nyena ngakho; hoba BUNYUBOUei ngo püetlabü.

¹⁷Ngeyang, chajih, hoba nangnak, ngo maang ngangbü lenlabü, hoba haoei ngeibü ngüh ditkulabü.

¹⁸Ngo khulimbo longbü wapyo ka haoei ngeibü langkei sangmai haksoa püeda; aieilausi kü to wapyobü juong kikei.

¹⁹Mühghaüei ditkulabü hoba haoen to jongailabü; hao shangieda kikei. Haoen to jaksheibü akisije haoenei Mühghaü to ühütda.

²⁰Hao yoa aoyou sangmaia kikei, haoen khulimbo haoeibü ik shatkei; haoei haoeibü thebülanbü leilua.

²¹Haoeibü sembung haabü tegü haajangtham, lausikei haoeibü maangpona oyolemen kia; haoeibü ngüh onang tokei loklokbou, lausikei kho setenbü inlou phatkei.

²²Kaibü onat BUNYUBOU la nongkuashi, hoba haoei no thounoulabü; haoei saopobü müt ladangkei atopeitilabü.

²³Lausikei, O Mühghaü, nyi haoen hailabü püngkhün to jinlabü; sii yungmangsühbü hoba khüpbülangbü müt jembü langkei salang po tho ongkei akilabü. Lausikei kü shangaje ngei ka to mailemlabü.