Read Chang Naga NYENSANG CHIA 57 Bible Online

NYENSANG CHIA 57 - Chang Naga bible

NYENSANG CHIA 57

¹Kü to sanoudamai, O Mühghaü, kü to sanoudambai; aishanga ngeibü langkei ka to satetlangda; haü habü thushed adanshongko; ngo kaibü yeme phanga satetlangda.

²Thükkabou Mühghaü aoei kü shanga pendou kümda, ngei hao to ngekkho.

³Aoei ngo suimangsühda, haoei kü to hakjinei, haoei khuthük ka yantilabü hoba ngo khümenlabü. Mühghaüei haoeibü sanoudambü hoba ngühmai hautilabü.

⁴Ngeibü langkei molosaonyu yoa kia; wanlong longbü yoa ngo kijan. Haoen müteibü shousishuong aoyoueibü hauh aubu hoba laujin; hoba haoeneibü lishang in akbü tegü.

⁵O Mühghaü, müh thükaenei no tonenashi; kaibü soneikangbü kaonyu pendou thüka kitishi.

⁶Haoenei ngeibü you shanga sung lamlea; ngo khonsakei khüpjung kouda. Haoenei küthedanga püngkhün thukuda; haoen jembü lolo khünei atetakei.

⁷Ngeibü maangpon atopeiko kia, O Mühghaü, ngeibü maangpon atopeiko kia; ngei chia laukho, haü, ngei nyensang chia laukho.

⁸Piashi, ngeibü soneikangbü! Piashi, pithung hoba kongkin! ngo lolo ngeyang enyu pilabü.

⁹Ngei phangshuong yoa ka to olinbü lenkho, O BUNYUBOU; ngei phang yoa ka to nyensang chia laukho.

¹⁰Aieilausi kaibü sanoudambü müh sühko, hoba kaibü ngühmai sangmei hau yaangbü ki.

¹¹O Mühghaü, müh thükkaboua no tonenashi; kaibü soneikangbü kaonyu pendou thüka kitishi.