Read Chang Naga NYENSANG CHIA 59 Bible Online

NYENSANG CHIA 59 - Chang Naga bible

NYENSANG CHIA 59

¹O ngeibü Mühghaü, ngeibü dangbou shuong ka ngo khümenashi; kükhu limbo lobü shuong ka ngo püetkai.

²Shabü kümbü shuong ka ngo senetashi. hoba sii maangdakbü shuong ka ngo khümenashi.

³Aieilausi chühashi, haoenei kü langkei shanga thoan haiyeida; hau kibü shuong ngo khulimbo kamsheida. Ngeibü shedbü ayingsi ngeibü shabü shanga aying, O BUNYUBOU.

⁴Kü to shedbü akinyu haoen laangda hoba lamleda; kü to thuila lamleashi, hoba chühashi.

⁵No lolo ong, O Thükenbü Mühghaü BUNYUBOU, Israel Mühghaü maialembü shuong pean chühla meimeiashi. Amaibü shedbü jungeibü aotokei nyi sanoutedam.

⁶Haoen chasem longeida, haoenei keiei tegü ngongko wida. hoba sangnyu kaijembo hauda.

⁷Chühashi haoenei jembü sembungei ngongda; haoeneibü lishanga in kia, lausikei haoen to aoei ditda?

⁸Lausikei, O BUNYUBOU, nyi haoen la nyikulabü; nyi maialembü shuong pendou la nyikulabü.

⁹O ngeibü hau, ngei no haiyeikho; aieilausi Mühghaü ngeibü lapheishon yaangbü ki.

¹⁰Kü to sanoudambou Mühghaüei ngo thangetlabü; ngeibü dangbou thüka ngeibü maangdak Mühghaüei kü la haptilabü.

¹¹Haoen tühaiti, khei ayinglonga kü mütli shuongei maanaplabü; O BUNYUBOU, küneibü aih; hoba haoen kaibü seisihauei lintiashi hoba haoen senyanshi.

¹²Haoeneibü sembung shabü hoba sembungkhop ngüh shanga; hoba haoenei khükbüuokbü hoba yepeijawebü ngüh shanga. Haoen khei jembü lilisesea laptishi.

¹³Khau longsi haoen mautishi, haoen touje langkei akilabü lele mautishi; hoba kaodak thonbü sühko Jakob to Mühghaüei songdakda dogo haoen la ngetiashi.

¹⁴Hobaje chasemlamto haoen longeitiashi, kei tegü ngüh longtishi hoba sangnyu kaiko hautiashi;

¹⁵haoenei shausiyung shanga ang louyen dogo shoongyolabü, hoba haoen senyüh ashemlonga langyang sünga kilabü.

¹⁶Lausikei ngei kaibü hau shanga laulabü; haü kaibü sanoudambü shanga ngei kaangko chia laulabü; aieilausi ngeibü khonku chaloua no ngeibü lapheishon yaangbü hoba satenshang kikei.

¹⁷O ngeibü hau, ka to ngei nyensang chia laukho; aishanga sanoudambü Mühghaü, ngeibü lapeishon yaangbü ki.