Read Chang Naga NYENSANG CHIA 60 Bible Online

NYENSANG CHIA 60 - Chang Naga bible

NYENSANG CHIA 60

¹O Mühghaü, nyi kün inleda, nyi kün leilutia; no kün to khauanga; lausikei tou no kün jungto sepeikaima.

²Nyi kao nyaaktia, kho leilubü kho maitiashi, aishanga kho nyaakeida.

³Nyi kaibü mütli la kümsilei sekbü lena; nyi kün la yeteilangeilabü ih yungtia.

⁴Ngühmai ngüh lenla shanga, ka to hatbü shuong la nyi nisan che kua.

⁵Nyi sanoubü khümenla shanga, kaibü mae ikei khümenashi hoba kün to jongaishi.

⁶Mühghaüei jembü saopobü lemshanga hai joyoa: “Thüksimina ngei Shekhem jannyinkulabü, hoba Sukkot pholi kü mütli la jankulabü.

⁷Gilead kü shangabü Manasse kei ngeibü; Efraim kü khu khümenbou hoba Jihuda ngeibü julo.

⁸Lausikei Moab ngeibü chaksiam sakshang; Edom to ngei ngeibü nguok tekan jinlabü. Filistiabüei ngo thükan ngekyola dambei si?”

⁹Aoei ngo kaangbüsekbü sangnyu khüto leian loula? Edom jungto aoei ngo leila?

¹⁰O Mühghaü, nyi kün tekan üp lo? hoba nyi, O Mühghaü, küneibü lakjaibü shuong yoa ayanglep lo?

¹¹Dangbou khulimbo nyi kün la thuibü labü; aishanga müteibü thuibü jim aki.

¹²Mühghaü danko künei hau kiko kümlabü; aishanga küneibü dangbou to nakeilabü kho hao ki.