Read Chang Naga NYENSANG CHIA 62 Bible Online

NYENSANG CHIA 62 - Chang Naga bible

NYENSANG CHIA 62

¹Ngeibü langkeiei Mühghaü shanga ong haiyeida; hao ka ngeibü khümenbü louda.

²Hao ong ngeibü laangnyu hoba ngo khümenbou; hao ngeibü lapheishon yaangbü; ngo ladangkei atopeilabü.

³Aieilausi phangan kibü ba tegü, kanei müt che haitila shanga, kan pendouei hao lalokche pheieila?

⁴Hao maibü ka lai tonyanla kho ong kanei ngühthang yenko joyoda; kan amlanga olinyoda. Kaneibü sembungei haükuda, lausikei maanga khükda.

⁵Ngeibü soushou, nyi Mühghaü shanga ong haiteishi, aieilausi ngeibü maanglem hao ka ki.

⁶Hao ong ngeibü laangnyu hoba ngo khümenbou; hao ngeibü lapheishon yaangbü ngo atopeilabü.

⁷Mühghaü yoa ngeibü khümenbü hoba ngeibü soneikangbü ki; ngeibü hau kho laang, hoba ngo satenshang Mühghaü to ki.

⁸Müt shuong kanei jih pendoua hao to mailemashi; hao junga kaneibü maangpon ipashi; Mühghaü sen shanga satenshang ki.

⁹Maimaitham hanbou müt kho hak ong, hoba müt yaangbou yepeibü ki. Haoen pendou seret che ong; haoen pendou souyoan haktokei songokbou.

¹⁰Shoeinakeibü to maitelem; hoba soshau soyungbü to amlang maanglem tepho; nyaksinam haa yaanga longa kaibü maangpon khünei tepho.

¹¹Mühghaüei che to joyoa, hau kho Mühghaüeibü dogo laubü ngei nyiboula dida.

¹²Tokei, O BUNYUBOU, üeisanou kaibü ki; aieilausi nyi mütpem weko la jembü kümsilei thüng kuda.