Read Chang Naga NYENSANG CHIA 65 Bible Online

NYENSANG CHIA 65 - Chang Naga bible

NYENSANG CHIA 65

¹O Mühghaü, Ziona nyensangei no haiteida; hoba kajunga theyolanyobü lelabü.

²No aoei welaubü ditda, ka jungto müt pendou loulabü.

³Shabüei ngo thükda, küneibü shedbü nyi sakenkulabü.

⁴Kaibü chema kilabü lele, nyi ao pienda hoba ka jungto loutida, hao haübou. Kaibü lembüchem saoposhanga kaibü chem maibüei küneibü maang senyühshemlabü.

⁵O kün khümenbou Mühghaü saopobüa hatlalühlabü kümsileiei nyi kün to jongailabü; Kaodak thonbü pendou, saabüa yungnyua kibü shuong maanglem shang no.

⁶Aoei jembü hauei shongh kaangkhühtham kümbei, seiei hao shembe kaian kia.

⁷No aoei yungnyu shuongei ngühbü, hoba shuong lemenbü küpjemtida.

⁸Saabüa kibü mütshuongei kaibü tetsida shuong to hatda; ngeyang si nangnak laka louda khübü kho nyi olintida.

⁹Nyi kaodak to thounouda hoba kho la dei kuda; nyi kho aeibou keitida. Mühghaüeibü shumang deiei shenan kia. Nyi kaodak kheinyu lamlean phaia nyi haoen la youshou kuda.

¹⁰Nyi khünei kao thuyetan kibü deiei maiko shentida, kao aongjung longbü shemjung attida; nyi kho langdeiei netla yeitida; nyi khünei kesiong yemtida.

¹¹Nyi po kho no maibüei püngtijuongtida, hoba kaibü lamnyua soptijaitida.

¹²Kho lamshaushangei shentida; hoba shongh shuong olinyoda.

¹³Lamshaushanga sanlon shuongei küplepnyu kia hoba pholikei youshouei küplepakei. Olinbüei haoenei ngekda, haoenei chiakei lauda.