Read Chang Naga NYENSANG CHIA 66 Bible Online

NYENSANG CHIA 66 - Chang Naga bible

NYENSANG CHIA 66

¹Kaodak pendouei Mühghaü junga olinbü ngüh longashi!

²Haoeibü nyen soneikangbü chia lauashi; haoeibü nyen soneikangtiashi.

³Mühghaü to lauashi, “Kaibü kümsilei shuong lai hatlamoklabü che! Kaibü sei yaangbü danko kaibü dangbou shuongei jembü lolo ka to natenlabü.

⁴Kaodak pendouei no lamlabü, hoba ka la chia atkulabü; haoenei kaibü nyena chia laulabü.”

⁵Kaiya, hoba Mühghaüeibü kümsilei shuong chühashi, müt aedanga haoei kümbüa hao hatlabü.

⁶Haoei yungnyu kaolin yeitikei; haoenei shumang kho danjung paiko haukei; hibü senei hao to olinkho.

⁷Haoei jembü hauei ponpen songdakda, haoeibü nyekei phang shuong to chühda, ngüha alebü shuongei lulu lolo tenaklepti.

⁸Phangshuongei Mühghaü haükushi, hoba haoeibü nyensang chia dittiashi.

⁹Haoei seneibü langkei kitida, hoba seneibü you atopeitida.

¹⁰Aieilausi, O Mühghaü, nyi kün takteia; chandinam takteibü tegü nyi kün takteia.

¹¹Nyi kün sunga mintikei; nyi kün la on atsheibü küntikei.

¹²Küneibü khu thüka nyi müt settida; Künei wan si dei danko haukei, lausikei nyi kün keisiyaang kaonyek che to leikei.

¹³Juokbü lembü jungan ngo kaibü chem to loukho, ngei ka la ngeibü thebülanbü kukho.

¹⁴Ngo khonsaka kijinei ngeibü sembung khopei laua, hoba ngeibü sembungei joyoa.

¹⁵Sanlon paang ponlem hibü lembü yoa, Amenbü juokbü lembü ngei ka la kukho; lon yoa masu pongsu lembü ngei kukho.

¹⁶Kan Mühghaü to hatbü pendou kaiya, hoba ditashi, hoba haoei kü langkei shanga haoei ai kümbei ngei ngetikho.

¹⁷Hobaje ngeibü lishangei hao la nyensang yaang kukei.

¹⁸Ngei ngeibü maangpona shabü maikukei tegüje BUNYUBOUei kü la aditkukhoulabü.

¹⁹Lausikei maimaitham Mühghaüei dida; haoei ngeibü welau ngüh dida.

²⁰Mühghaüei ngeibü welau üpbu, hoba haoeibü sanoudambü kü ka asungngai; hao haübou yingshi!