Read Chang Naga NYENSANG CHIA 68 Bible Online

NYENSANG CHIA 68 - Chang Naga bible

NYENSANG CHIA 68

¹Mühghaü meimeiashi, haoeibü dangbou shuong lintiashi; Toukei aoyouei hao to mangsenda hao jungka haoen satyotiashi.

²Wankhük sattibü tegü, haoen shian sattiashi; Wan thedanga naolep tühnyinbü tegü, amaibü shuong Mühghaü thedanga mautiashi.

³Lausikei saopobü shuong olintiashi; Mühghaü thedanga uihintiashi, haü, maang pungenko haoen olintiashi.

⁴Mühghaü la chia atkushi, haoeibü nyensang chia lauashi; aoei sangliphang danko setan hauda hao shanga lam longtiashi; haoeibü nyen BUNYUBOU, hoba kanei hao thedanga uihinashi.

⁵Bou akibüeibü bou hoba latnyu matjembou kho Mühghaü, hao jembü saoposhanga ki.

⁶Sangliphanga kibü haoei chema kitida; thüngbü shuong haoei naangmaibü to leiyenda; lausikei ngüha alebü kaolina kida.

⁷O Mühghaü, no ladang kaibü mütli jungto haukei; no ladang sangliphang danko haukei.

⁸Kaoei nyaakkei, Mühghaü thedanga müheikei lang yantikei; thinei hauan kibü Sinai Mühghaü junga, khei Israelbü Mühghaü thedanga lühkei.

⁹O Mühghaü, nyi lang juong yantikei, kaibü kao hüan kijinei kho nyi sinngaitikei.

¹⁰Kaibü tan khünei kikei, O Mühghaü, nyi no maibü ka shalebü shanga lamlekukei.

¹¹BUNYUBOUei, ngühkhüm kho kuda; yaksa aoyouei ngühlang kho kuda haoen shuong yaangbü ki.

¹²“Choba shuong hoba haoeneibü sekbülakbü shuong laangjung satkhümda! Chema kibü yaksa shuongei haoenei soletbü peisilei janyoda.

¹³Dukutukeibü kaak chandinamei hoba haoeibü kaakthon hon semjeibüei naanglepan kibü tegü kan sanlon thüngshanga yepan kilep lo?”

¹⁴Pendou Thükenbouei khünei kibü Choba shuong lintijinei, Zalmona ninthu atbü tegü kikei.

¹⁵Bashan shongh kho Mühghaüeibü shongh ki, shongh suokbü kho Bashan shongh ki.

¹⁶O shongh suokbü shuong, shongh laobou Mühghaüei hao kila maikukei, khübü shongh to kan aila nyekto shatda? Haü, BUNYUBOU khünei ponpen kilabü.

¹⁷Mühghaüeibü wapyobü kailong hajar saoche, haü, hajar, hajar, BUNYUBOU haoen yoa kia, Sinai lemshanga kia.

¹⁸No thükaeto angkei, nyi langsenbü leilangkei. nyi müt yoka jongsak sungletkei, haü, BUNYUBOU Mühghaü haoen yoa kilabü lele, ngüha alebü shuong kakei sungletkei.

¹⁹Mühghaü ao sen khümenbou ki, BUNYUBOU aoei chalou weko seneibü on künda, hao haübou.

²⁰Seneibü Mühghaü kho khümenbou Mühghaü ki, hoba haibü pekan apbubou kho BUNYUBOU Mühghaü shangabü ki.

²¹Lausikei Mühghaüei haoeibü dangbou shuongeibü khu ngümnyinkulabü. Aoei jembü shedbüa athakko hauda haoeibü khulou yembü khu ngümnyinkulabü.

²²BUNYUBOUei laukei, “Kaibü you siia shemtilabü lele, hoba kaibü keishuongei semangmaiko setilabü lele, ngei kaibü dangbou shuong

²³Bashan ka haoen nyibou leijung loulabü, hoba ngei haoen yungnyu haübü ka leian loulabü.

²⁴Lemshang to kaibü tan haubü, O Mühghaü, haoenei hapa, khei ngeibü Mühghaü, ngeibü Choba haubü hapa.

²⁵Medei shuong busen kaangko tombülakbü yoa, chia laubü shuong shaang haukei, hoba haoen phainei kongkin tuokbü shuong sembei.

²⁶Kan Israelbü bakshang ka longbü shuongei, shuong yoa Mühghaü, khei BUNYUBOU haükushi.

²⁷Napeibou Benjamin haoen songdakbou, Jihuda yaangenbü shuong hoba haoen dan, Zebulun yaangenbü shuong, Naftali yaangenbü shuong ki.

²⁸O Mühghaü, kaibü hau ngaletashi, O Mühghaü, no aoei kün shanga kümbei, nyi no lolo hau kian lenashi.

²⁹Jerusalema kaibü lembü chem kisije Choba shuongei ka jungto jongsak jungan loulabü.

³⁰Hon laang you phanga nakeiko, thakdu laaka kibü yamkabü meisiau masu pongsu shuong mütshuongeibü masu shoushou shuong yoa hakashi. Mütshuong aoyouei wapyola maangtakda, haoei haoen lintia.

³¹Khuleibü shuong Ijep ka longlabü; Ethiopiaei haiyeiko Mühghaü jungto ik shinglabü.

³²Kan kaodak sangle shuongei Mühghaü to chia lauashi; BUNYUBOU to nyensang chia lauashi.

³³Kaobakjinei ka kibü müh laobou mühdaka setda, hao to nyensang chia lauashi. Chühashi haoei ngüh longda, hoba kho ngüh yaang.

³⁴Mühghaüeibü seisihau phinthonashi, hao yaangenbü Israel thüka kia; hoba haoeibü hau müh shuonga ki.

³⁵O Mühghaü, no kaibü lemshang ka hatlamoklabü che; Israel Mühghaü, haoei jembü mütli la hau hoba sei kuda. Mühghaü haübou yingshi!