Read Chang Naga NYENSANG CHIA 69 Bible Online

NYENSANG CHIA 69 - Chang Naga bible

NYENSANG CHIA 69

¹Ngo khümenashi, O Mühghaü; aieilausi ngeibü ngüma thükko deiei danglepda;

²Ngo thim haübüa nyemda, khünei youphen lamshang aki; Ngo dei haübü to atakei, khünei ngo deiei danglepda.

³Ngekbüei ngo hüanshemda; ngeibü sanglou uda; Ngeibü Mühghaü shanga haiyeijinei kü nyekei anatda.

⁴Ai ayingko kü to mangsenbü shuong ngeibü khua khulou tokei juongbou kia; Amlanga ngeibü dangboulabou yeibü, aoyouei ngeibü langkei mautimang sühda, hau kibü ki, Ngei ai akoknyu haoenei kho kü la kungaitida.

⁵O Mühghaü, nyi ngo songsido akibü ngekei, hoba ngeibü shabü ka ka huan aki.

⁶O Thükenbou BUNYUBOU Mühghaü, aoyouei no khangenda haoen ngo danko himou tebauti, O Israel Mühghaü, aoyouei no lamda haoen ngo danko himou to tütti.

⁷Aieilausi ka shanga ngei hakbü natena; Himouei ngeibü thenyek küplepa.

⁸Ngeibü jaisina yoa ngo yenboula yeian kia, hoba ngeibü nyueibü shousi yoa ngo küksithang tegü ki.

⁹Aieilausi kaibü chem shanga maangtakbüei ngo lonshemda; hoba aoyouei ka to hakda haoen to hakbüei kü to süha.

¹⁰Ladang ngo haapbü hoba mühei nyengbüei ngeibü langkei shieikoekei kho kü shanga hakbü kiteikei.

¹¹Ladang senounei kho ngeibü neisimei yeitikei, ngo haoen shanga laueilabü che yeikei.

¹²Bakhüna setbü shuongei kü shangabü laueida; hoba ihjakbü shuongeibü chia ngo ki.

¹³Lausikei kü shangaje, O BUNYUBOU, jih tükdea ngeibü welau ka jungto künda. O Mühghaü, kaibü sanoudambü juong danko kaibü khümenbü ngühmaia kü to jongaiashi.

¹⁴Thim ka nyi ngo khümenashi hoba ngo tenyemti; ngo mangsenbü shuong ka hoba dei haübü ka ngo khümenashi.

¹⁵Yungsenei ngo tetanglepti, dei haübüeikei ngo tesuiti. hoba püngkhünei haoeibü sembungei teküplepti.

¹⁶Kü to jongaikei, O BUNYUBOU; aieilausi kaibü üeisanou maibü ki, kaibü üeisanou dambü soubü thüng no kü ae sepeiashi.

¹⁷Hobaje no khangenbou ka nyi kaibü thenyek tehu; aieilausi ngo khonkua kia; kü to tongde jongaiashi.

¹⁸Ngeibü langkei nyangko kaiya hoba kho angthetashi; Ngeibü dangboulabou shuong ka ngo solo haptikai.

¹⁹Kü to amaiko jungeibü ngeibü himou hoba kü the mentibü nyi ngekei; ngo khulimbü pendou ka thedanga kia.

²⁰Mangthem jungeibüei kü maangpon leilua hoba ngo hailabü tegü odanongda. Hobaje kü to sanoudamtila shanga ngei at lambei lausikei ao akitei; hoba haksotilabü lambei lausikei ngei ao ühüp.

²¹Haoenei toukei ngeibü shausiyung shanga kü la khauekbü kukei; hoba ngo deilajinei haoenei kü la yungla haijepbü kukei.

²²Haoen jembü khümsok haoen shanga sung yeitishi; hoba haoen haksoa kijinei, kho haoen shanga shembü sung yeitishi.

²³Haoenei ühüplabü lele haoeneibü nyek mangthüngtham aptishi; hoba haoeneibü shenjang athakko lühtishi.

²⁴Kaibü maang ühaibü yaang haoen la jinkuashi; hoba kaibü kaangbü sekbü khauangei haoen laphettishi.

²⁵Haoen kishang sangliphang la yeitishi; haoeneibü neichema aokei tekiti.

²⁶Aieilausi nyi aoto ngümbei haoenei hao shieikoeda; hoba aoyou nyi leilutikei haoeneibü khonku shanga haoenei lauda.

²⁷Shedbü thükto shedbü jinkushi; hoba haoen kaibü saopobü to telouti.

²⁸Langkeibü le ka haoen haman apbushi, hoba saopobü shuong yoa tedoyo.

²⁹Lausikei ngo shalebü hoba maangshata kia; O Mühghaü, kaibü khümenbüei ngo thükaenei phokushi.

³⁰Chiaei Mühghaü nyensanglabü, hoba nyensangei ngei hao yaangentilabü.

³¹Hobaje masu toje aei, ayingsi laang hoba haak yembü masu pongsu tokei aei, khoei BUNYUBOU maang haitilabü.

³²Eaa oabü shuongei kho hapa, hoba olinda; kan aoyouei Mühghaü lamda kaneibü maangpon langkei kitishi.

³³Aieilausi BUNYUBOUei khambo kibü to ngüha lekuda, hoba haoeibü langsenbü shuong to aweasüngko ajungeida.

³⁴Mühsi kao hamei, yungnyu hoba khünei paibü pendouei hao sangashi.

³⁵Aieilausi Mühghaüei Zion khümenlabü, hoba Jihuda sangnyu shuong kümlabü, hoba haoen khünei kilabü hoba kho haoen shangabü yinglabü.

³⁶Hao khangenbü shuong lilabüeikei kho phet phanlabü; hoba aoyouei haoeibü nyen sanouda haoen khünei kilabü.