Read Chang Naga NYENSANG CHIA 7 Bible Online

NYENSANG CHIA 7 - Chang Naga bible

NYENSANG CHIA 7

¹O BUNYUBOU, ngeibü Mühghaü, ngo ka to satetlangda; ngo shieibü pendou ka ngo püetashi hoba ngo senetashi.

²Khei ayinglonga haoenei ngeibü langkei molosaonyuei jitnyinbü tegü senetbü aokei akiko netla yeiko jitnyinlabü.

³O BUNYUBOU, ngeibü Mühghaü, ngei ho küman kia longa; kü to shedbü shabü kian kialonga, kü thangbou la amaibü kungaian kialonga, haü, ai ayingbüa ngei ngeibü dangboueibü soan kialonga,

⁵dangbouei ngeibü langkei shieitiashi hoba ngo laphettiashi; haü, hao la ngeibü langkei kao la yeiko nakeitiashi; hoba ngeibü nyenhang thamngua kitishi.

⁶O BUNYUBOU, no khauangbüa meimeiashi; ngeibü dangbou shuong khauang khulimbo nyi phonenashi; hoba kü shanga laksepashi, nyi matjem lamlea.

⁷Hobaje phangshuong dan no kaijembo kamsheitiashi; hoba haoen thüka no thükaenei setashi.

⁸BUNYUBOUei phangshuong matjemda, O BUNYUBOU, ngeibü saopobü thüng, hoba ngo ngühmaanglanbü thüng kümat jemashi.

⁹Amaibü dan amaibü thonshang to loutishi, lausikei nyi saopobü shuong kaangngaitiashi; aieilausi saopobü Mühghaüei songsido hoba maangpon takteida.

¹⁰Ngeibü aih Mühghaü yoa kia; haoei maang tangbü shuong püetda.

¹¹Mühghaü saopobü matjembou ki, haü, chalou angboua khauangbü Mühghaü che.

¹²Mütei maangpon asepei longa, haoei jembü in ulabü; haoei jembü lau büha, hoba kho lamlea,

¹³Haoei tokei hao shanga haibü longtibü peisilei lamlea; haoei jembü laujin wanthonbü laujinla yeitida.

¹⁴Chühashi, asaopobü mütei shia shabü künda, haü, amaibüei hao mang akongko yeia, hoba jim akibü buka.

¹⁵Haoei püngkhün che thuan yeia, hoba haoei thubü püngkhüna hao atan kia.

¹⁶Haoeibü kümsilei amaibü hao jungto sepeinyu ngaida. Hobaje haoeibü kaangbü sekbü kümsilei haoeibü khua thonda.

¹⁷Haoeibü saopobü thüngei BUNYUBOU sanglabü; hoba thükkabou BUNYUBOU nyensang chia laulabü.