Read Chang Naga NYENSANG CHIA 72 Bible Online

NYENSANG CHIA 72 - Chang Naga bible

NYENSANG CHIA 72

¹O Mühghaü, nyi kaibü matjem Choba la kuashi, hoba kaibü saopobü Chobaeibü shoula kuashi.

²Hibü haoei kaibü mütli saopobüei matjemlabü; hoba shalebü kaibü mütli saopobüei matjemlabü.

³Shongh suokbüei mütli jungto sangmai hakso sungbalabü, hoba shonghshouei saopobü sungbalabü.

⁴Haoei mütshuong yoa shalebü la yingkulabü; haoei athükaminbü shousi shuong püetlabü, hoba khonkutibü shuong netlayeiko nitnyinlabü.

⁵Meten pendoua chanyu anep shongko hoba litnyu anepshongko haoenei ka to soumo hatlabü.

⁶Sang wapan phobü to langei nembü tegü, langminei kao nemtibü tegü hao louyenlabü.

⁷Litnyu anepshongko haoeibü chaloua saopobü shuong haalabü, hoba sangmai hakso juong haalabü.

⁸Yungnyu ka yungnyu sühko, hoba shumang ka kaothon sühko haoei songdaklabü.

⁹Sangliphanga kibü shuongei hao thedanga khüpetlabü; hoba haoeibü dangbou shuongei thamngu selabü.

¹⁰Tarshish hoba su kabü Choba shuongei khüm kulabü; Sheba hoba Seba Choba shuongei jongsak kulabü.

¹¹Haü, Choba pendouei hao thedanga khüpetlabü, phang pendouei hao khangenlabü.

¹²Aieilausi shalejonglebü shuongei hoba thuilabü akibü shalebüei ngekjinei haoei püetlabü.

¹³Hau akibü hoba shalejonglebü to haoei sanouko dambuda, hoba shalejonglebü langkei haoei püetlabü.

¹⁴Haoei haoen langkei khonku hoba kaangbüsekbü kümsilei ka angetlabü, hoba hao thedanga haoeneibü sii namsek kilabü.

¹⁵Hobaje hao salang lounyu kilabü, hoba hao la Shebaeibü hon ka kulabü, hoba mütshuongei hao to athakko welaulabü; chalou sünga haoenei hao haükulabü.

¹⁶Kaonyeka shongha youshou juong kilabü, khünei hekbü buhek Lebanon kabü tegü nyaakeilabü; hoba sangnyua kibü shuong kaoa sang tegü haalabü.

¹⁷Haoeibü nyen ponpen janbümubü kilabü; chanyu anepshongko haoeibü nyen athonko kilabü, hoba müt shuong hao danko haülabü, phang pendouei hao to haübou dogo laulabü.

¹⁸Israel Mühghaü BUNYUBOU nyen sangshi! Hao mütpemei ong habü seikümseilei kümda.

¹⁹Haoeibü soneikangbü nyen ponpen sangshi! Haoeibü soneikangbüei kaodak pendou shentishi. Amen! hoba Amen!

²⁰Jesseeibü shou Dawideibü welau thonbü.