Read Chang Naga NYENSANG CHIA 73 Bible Online

NYENSANG CHIA 73 - Chang Naga bible

NYENSANG CHIA 73

¹Tükde Mühghaüei Israelbü to maida, haü, sensimaang hinseibü shuong to maida.

²Lausikei ngoje, ngeibü you loubou satanapan kikei; ngeibü younak sheketlabü lele kikei.

³Aieilausi ngei müt amaibü shuong naangmaibü hapjinei ngei haoen to nyekto shatkei.

⁴Aieilausi haoen khonkuko aki, haoen mangsisau sekoktham kia.

⁵Haoen lubü müt tegü khonsak khonku aki; lubü müt tegü ai khonku onat aki.

⁶Hibü yonglam lili haoeneibü ngüma yak tegü yakan kia; neisimei tegü kaangbü sekbü thechühei haoen nyonglepan kia.

⁷Haabüei haoeneibü nyek petjung longan kia; maangponei dühbü to liman haoenei kia.

⁸Haoenei mü la nyikuko awesüngko lauda, haoenei kui to angan lauda.

⁹Haoeneibü sembungei müh sühko angan lauda; hoba haoeneibü lishangei kaodakbü mütshuong shujembo lauda.

¹⁰Hibü mütshuong haoen ae sepeida, hoba haoeneibü dei yungda.

¹¹Hibü haoenei lauda, “Mühghaüei lai ngela, hoba Thükkabou to hapbü ngebü kia lo?”

¹²Chühashi, amaibü shuong kho habü ho; ponpen hopatham kisije haoeneibü nyaksinam haada.

¹³Hibü kongkongbüa ngeibü maangpon hinseikei, hoba shedbü akibüa ngeibü ik sakkei.

¹⁴Aishanga chalou sünga ngo khonkuda; hoba ngeyang weko ngo shieinangeida.

¹⁵Ngei khei lauko dogo laua tegüje; chühashi, kaibü shousi shuong meten yoa ngei huonkoyouko küman kikhoulabü.

¹⁶Ho lai ditenla dogo ngei daman chühjinei, ngo Mühghaü lemshang to hauan

¹⁷haoeneibü phaiabü thu daman achühshongko, kü shanga ho yongko khonkulabü che kiteikei.

¹⁸Maimaitham nyi haoen kao shekshekbüa phokuda; maulabü lele haoen apyoda.

¹⁹Longche danga haoen lai shakkei shakko yeida, hatlamoklabüei haoen lemailela mautia!

²⁰Manghliko pisi, O BUNYUBOU, ladang no pilaje nyi haoeneibü dambü kongkong yeitishi.

²¹Aieilausi ngeibü maangpon maangngangko kikei; hoba ngeibü dambü phenyeman aptikei.

²²Ngo yongko songsido mauan apan, hoba ange ühüpbo kikei; ngo ka thedanga meisiau tegü kikei.

²³Khei yingsikei ngo ka yoa athakko kia; nyi ngeibü mae ika senetkei.

²⁴Nyi ngo kaibü songeidoei leilabü, hoba ngo phaia soneikangbü to sungletlabü.

²⁵Ka to limbo ngei khuthüka ao ki? hoba kaodaka ka to limbo ngei mangsühbü ao aki?

²⁶Ngeibü phe hoba ngeibü maangponei athükamin hapda, lausikei Mühghaü ponpen ngeibü maangpon hau hoba ngeibü phejan ki.

²⁷Aieilausi chühashi aoyou ka jungka saabüa ki haoen maulabü; aoyou ka jungka talako satda haoen pendou nyi mautia.

²⁸Lausikei no nyangko loula kü shanga maiakei; haoeibü kümsilei pendou lenlabü lele, ngei BUNYUBOU Mühghaü ngo satenshang yeitia.