Read Chang Naga NYENSANG CHIA 77 Bible Online

NYENSANG CHIA 77 - Chang Naga bible

NYENSANG CHIA 77

¹Ngeibü ngühei khei Mühghaü to ngeibü ngühlangei, ngei Mühghaü to ngekda, hoba haoei kü la ditkuda.

²Ngo khonsakbü jiha ngei BUNYUBOU lamda; nangnak ngeibü ik tuokyonyu kikei; ngeibü soushouei haksomang asüh.

³Ngeibü Mühghaü shanga damanchühda hoba maangmauda. Ngei daman chühda hoba ngeibü soushou semthetda.

⁴Nyi ngo nyeket ashitida; ngo maangmaubüei ai ongkei alauda.

⁵Ngei pisibou jih shangiedbü thu shangabü damanchüha.

⁶Nangnak ngei ngeibü chia damenda; ngei ngeibü maangpon yoa joyoda; hoba ngeibü soushouei maangsangko lemda.

⁷BUNYUBOUei ponpen shanga ngo apyolep lo? hoba haoei touje kü to amailep lo?

⁸Haoeibü onou ponpen shanga sada sai? Haoei thekubü touje kongkong sai?

⁹Mühghaüei sanouko damlabü maan apa sai? Hao khauangko haoei onou khina sai?

¹⁰Hobaje ngei laukei, “Ho ngo hau akibü; lausikei Thükkaboueibü ik mae aenei kibü chaloua ngo damenlabü.

¹¹Ngei BUNYUBOUeibü kümsilei shuong damenlabü; haü, shangiedbü kaibü seikümseilei shuong ngei damenlabü.

¹²Tokei kaibü kümsilei shanga ngei daman chühlabü; hoba nyi kümbü shuong shanga laueilabü.

¹³O Mühghaü, kaibü lamnyu saopobü kia, küneibü Mühghaü tegü ai mühghaü yaangbü ki?

¹⁴Seikümseilei kümbü Mühghaü kho no; phangshuong to nyi kaibü hau lena.

¹⁵Nyi kaibü ikei ka mütli, Jakob si Josefeibü shousi shuong angthetda.

¹⁶O Mühghaü, ladang yungnyu shuongei no hapbei haoen hatkei hoba yungnyu haübü shuongei lühkei.

¹⁷Sangmeiei lang yantikei; mühei langmak maktikei; kaibü laujin shuongkei pendou ae haukei.

¹⁸Kaibü langmak ngüh müha kiteikei; langpon shuongei kaodak ngesaktikei; kaodakei lühko topeikei.

¹⁹Kaibü lamnyu yungnyua kia, hoba kaibü haang yungnyu yaangbüa kia; hoba kaibü youmo shuong alamen.

²⁰Mosa si Aroneibü ikei nyi kaibü mütli san tan tegü leiyeikei.