Read Chang Naga NYENSANG CHIA 78 Bible Online

NYENSANG CHIA 78 - Chang Naga bible

NYENSANG CHIA 78

¹O Kü mütli shuong, ngeibü ngühkhüm ditashi, kü sembung ka longbü ngüh ditla kaneibü nou haangashi.

²Ngühphatbü lauko ngei ngeibü sembung iplabü; ngei shangiedbü hangbü ngüh laulabü.

³Laobou künei ditkei hoba ngekei hoba küneibü nyusibousi shuongei kün la lenan apyokei.

⁴Haoeneibü shousi shuong ka khübü künei huan apholabü; lausikei BUNYUBOUeibü nyensang hoba haoeibü hau hoba haoei kümbü seikümseilei shuong loulabü meten la lenlabü.

⁵Aishanga Jakoba haoei aukabü che lamlekei, hoba Israela ngühkhüm che kümbei. Haoeneibü shousishisi to lenla shanga haoei küneibü pisibousi la sakkukei.

⁶Loulabü meten khei buklabü kibü shousiei ngelabü lele, hoba haoeneikei meimeian haoeneibü shousila lenlabü lele.

⁷Hobaje haoeneibü pisibou tegü ngüha alebü hoba athepetbü meten che;

⁸meten laoboua aoyoueibü maangpon tükde aphoen, hoba aoyoueibü soushou mühghaü yoa tükde akitei.

⁹Efraimeibü shousishuong, laujinei wapyola lamlean lason ka sepeinyu ngaikei.

¹⁰Mühghaüeibü thebülanbü haoenei ajungei; hoba haoeibü ngühkhüm phanga paimang asüh.

¹¹Hobaje haoenei haoei kümbü shuong, hoba haoei haoen la lenbü seikümseilei shuong maan apbei.

¹²Ijep kaodaka Zoan khongthua haoeneibü pisibou thedanga haoei seikümseilei kümbei.

¹³Haoei yungnyu kho jankei, hoba haoen dantikei; hoba dei kho ontoula yeikei.

¹⁴Hobaje chaloua sangmeiei hoba nangnak langyang pendou wan thaonyu ngesakbüei haoei haoen leikei.

¹⁵Yama haoei laang paknyinkukei, hoba kuokkhün ka tegü dei koutikukei.

¹⁶Haoei laang ka shushou shuong kümbei, hoba dei shumang tegü koutikei.

¹⁷Lausikei phetsen kaoa Thükkabou khulimbo lokei; haoenei hao khulimbo aei ong shabü shonkei.

¹⁸Hobaje haoenei shaumangsühbü shausiyung hiko haoeneibü maangpona haoenei Mühghaü takteikei.

¹⁹Haü, haoenei Mühghaü khulimbo laukei, “Yama Mühghaüei lem oknyinla thüklep lo?

²⁰Chühashi, toukei dei apsileko longtikei, haoei laang to meitikei hoba shushou juong koukei. Haoei wentekkei kuenlep lo? Haoeibü mütshuong shanga phe kula thüklep lo?”

²¹Hibü BUNYUBOUei ditkei hoba maangpokkei; hoba Jakob khulimbo wan che jikkei hoba Israel khulimbo khauangkei.

²²Aieilausi haoenei Mühghaü to maialem; hoba haoeibü khümenbüa mailem aki.

²³Khei yinga tegükei thükae mühshuong la haoei sakkukei, hoba müh koukap shuong ipbei.

²⁴Hobaje haoei haoen thükto shaula shanga manna attikukei, hoba khuthük ka haoen la shausiyung kukei.

²⁵Mütshuongei khuthükbü wentek shaukei, haoei haoen la shausiyung apsileko yantikukei.

²⁶Haoei müha chaangbou yei soutikei; hoba haoei seiei apae yei leiyeikei.

²⁷Haoei phe thamngu tegü hoba kaakyembü au yungnyu phetsen tegü haoen thükto attikukei;

²⁸hoba haoei haoen shaishang, haoen kaijembo kho attikei.

²⁹Hibü khoei haoenei shauan shishenkei, aieilausi haoei haoen la haoenei mangsühbü kukei.

³⁰Lausikei haoenei mangsühbü ka abangjinei shausiyung tokei haoeneibü hakena kijinei;

³¹haoen khulimbo Mühghaü khauangkei, hoba haoen yoa hau kibü shuong haitikei, hoba Israelbü heshou shuong maangto attikei.

³²Yongbou, haoenei shabü shondang lekei, hoba haoeibü seikümseilei to maialem.

³³Hibü haoeneibü chalou shuong kongbüa, hoba haoeneibü po shuong khonsaka dantikei.

³⁴Haoei haoen haitisi ong haoenei hao lambei; hoba haoen maangpon sepeikei hoba maang kuko Mühghaü lambei.

³⁵Hobaje Mühghaü haoeneibü laang, hoba Thükkabou Mühghaü haoen angthetbou dogo haoenei damenkei.

³⁶Lausikei haoenei sembungei hao amlanga sangkei hoba haoeneibü lishangei hao to yepeikei.

³⁷Aieilausi haoeneibü maangpon hao yoa tükde akitei, ayingsi hao to theyolanyobüa haoenei maialemen.

³⁸Lausikei hao onoubü kibüei haoei haoeneibü shabü apbukei hoba amauti; haü, annebenko haoei khau üangko natenkei hoba haoeibü khauang khümbo along.

³⁹Hobaje haoen kho phe kong dogo, hoba yei soujung danan sepeinyu alongeibü him dogo haoei damenkei.

⁴⁰Ladüngnei ong yama haoenei hao khulimbo meimeikei, hoba phetsen kaoa hao maangto shattikei!

⁴¹Hobaje toukei haoenei Mühghaü takteidang lekei; hoba Israel Saopobou maangto shattikei.

⁴²Haoenei haoeibü ik ayingsi dangbou ka haoei haoen püetbü chalou adamen.

⁴³Khei haoei Ijep kaodaka haoei tetsida lenbü, hoba Zoan khongthua seikümseilei lenbü adamen.

⁴⁴Hobaje haoeneibü shumang hoba shushou shuong haoenei ayungenlabü lele sii la yeitikei.

⁴⁵Haoei haoen yoa meishou pühtikei, laobouei haoen khonkutikei; hoba yuk pühtikei, laobuei haoeneibü kaonyu yeplepbei.

⁴⁶Tokei sek ka longbü kesiong shuong haoei yangsikok la, hoba haoenei mouenbü koksüngla shautikei.

⁴⁷Haoeneibü semlühlaak haoei senlaangei leilutikei, hoba bhuklong shuong aeibou khambüei lintikei.

⁴⁸Tokei masu shuongkei senlaangei tetettikei, hoba haoeneibü shatsinam shuong langponei phauettikei.

⁴⁹Haoei haoen thükto sei kaangbü sekbü khauang hoba maangshat hoba khonku shabü hangangbü shuong tegü hautikei.

⁵⁰Haoei hao khau angmangsühbü tegü longtikei; haoeneibü langkei haibü ka haoei asenet; lausikei haoeneibü mang limsilang la kukei.

⁵¹Hobaje Ijepa shaang bukbü shousishuong hoba Ijepbü neichema hauki yaangkibü shuong haitikei.

⁵²Kho phaia haoei haoeibü mütli san tegü leiyenkei, hoba meisiau tan tegü yama haoen leiyeikei.

⁵³Hobaje haoen ühütlabü lele haoei haoen maisho leiyeikei; lausikei haoeneibü dangbou shuong yungnyuei phonglangkei.

⁵⁴Hobaje haoei haoen haoeibü saopobü kaodak, khei haoeibü mae ikei kümbü shongh kaodak sühko leibakei.

⁵⁵Phangshuong khokei haoen thedang ka haoei shian sattikei; hoba haoeneibü phet janan leilang jankukei; hoba Israel phangshuong haoen lulueibü neichema kitikei.

⁵⁶Khei yingankei Thükkabou Mühghaü khulimbo haoenei hao takteikei hoba khulimbei; hoba haoeibü aukabü shuong ajungei.

⁵⁷Lausikei sepeijung satkei hoba haoeneibü pisibousi shuongei tegü khüpbolangko jungeikei; kombünongbü laujin tegü haoen nongkosaiko satkei.

⁵⁸Aieilausi haoeneibü shongh suokbü lembüei hao khauangtikei; hoba haoeneibü heangshoei hao nyek to shattikei.

⁵⁹Ladang Mühghaüei kho ditkei, hao aeibou maangpokkei; hoba Israel lemailela apyokei.

⁶⁰Khoei Shilo neichem, laobou haoei mütshuong yoa phokukei kho haoei apyokei.

⁶¹Hobaje haoeibü hau lubü la langtikei, hoba soneikangbü dangbou ik to kukei.

⁶²Khauangko haoei hao mütli mü ikmang to kukei, hoba haoeibü phetphan dangbou shuong ik to kuan apbei.

⁶³Wanei heshou shuong suikei; hoba haoeneibü medei shuongei chemkanbü chia alau.

⁶⁴Haoeneibü ungshedbou shuong inei haikei, hoba latnyu shuongei mangühaap.

⁶⁵Kheijinei yepbü ka pibü tegü, ihei jakbü hau kibüei ngekbü tegü BUNYUBOU laksepbei.

⁶⁶Hobaje haoei haoeibü dangbou shuong shenjang to ngümbei; haoei haoen ponpen shanga himou bautikei.

⁶⁷Kho to limbo haoei Josefeibü neichem asunglet, hoba Efraim phang apien.

⁶⁸Lausikei haoei pienbü Zion shongh Jihuda phang pienkei.

⁶⁹hoba haoei haoeibü saopobü lemshang müh suokbü tegü kümbei; ponpen shanga haoei kaodak yaüan phobü hima.

⁷⁰Tokei haoeibü sambü Dawid kei haoei pienkei, hoba san shuong yoka sungenkei.

⁷¹Sen nyatbü san phainei sembü ka haoei hao mütli Jakob, hoba haoeibü phet Israel sanlombou yingla haoei leian loukei.

⁷²Hibü hao maangpon tangbüei haoeneibü sanlombou yeikei; hoba haoeibü ik tangbüei haoen leiyeikei.