Read Chang Naga NYENSANG CHIA 79 Bible Online

NYENSANG CHIA 79 - Chang Naga bible

NYENSANG CHIA 79

¹O Mühghaü, kaodakbü shuong kaibü phetphan kaodak to loda; kaibü saopobü lembü chem haoenei shatia; haoenei Jerusalem nopnyinnyin apbuda.

²Müha aushuongeibü shausiyung shanga, haoenei no khangenbüeibü mang shuong kua. Kaodakbü meisiau la kaibü saopobü shuongeibü phe kua.

³Jerusalem kaijembo dei tegü haoenei haoeneibü sii phina; hoba haoen khünla ao akitei.

⁴Küneibü lepbüsangmangei kün to mangsenda, hoba kün kaijembo kibü shuongei kün la nyikuda.

⁵O BUNYUBOU, lalokche? Athonsapbo no khau anglep lo? Kaibü khauang kho wan tegü longyonyu khüplep lo?

⁶No angebü phang shuong thükto, hoba ka to awelaubü sangle shuong thükto maangshat jinkushi!

⁷Aieilausi haoenei Jakob suia hoba haoeibü kishang leilutikua.

⁸Küneibü pisibou shabü shuong kün khulimbo nyi tedamen; kaibü onoubü nyek kün jungto tongde hautishi; aieilausi kün aeibou yana.

⁹Kaibü nyen soneikanglabü kaibü nyen shanga kün to thuishi. O kün khümenbou Mühghaü, kün khümenashi hoba küneibü shabü apbushi.

¹⁰“Haoeneibü Mühghaü lanei ki,” dogo aila phangshuong la lautila? No khangenbü shuong sii phinbü phoklambü kho künei hapbo phangshuong yoa ngetiashi.

¹¹Langsenan kibü shuongei wibü ka jungto loutiashi, kaibü sei yaangbü thüng hailabü shuong kho khümenashi.

¹²Hobaje O BUNYUBOU, laobou mangsenbüei haoenei no mangsenkei, haoeneibü khuku to nyetnei aei, kaneibü lepbü sangmang shuong to mangsenbü kungaiashi.

¹³Kheijinei ong kün kaibü mütli hoba kaibü lamshaushanga lamshaubü sanshuongei ponpen thon akiko kaibü nyensanglabü; meten meten künei kaibü nyensang ngetilabü.