Read Chang Naga NYENSANG CHIA 81 Bible Online

NYENSANG CHIA 81 - Chang Naga bible

NYENSANG CHIA 81

¹Seneibü hau Mühghaü to chia kaang lauashi; Jakob Mühghaü to olinbü ngühlang kuashi.

²Chia lauashi, hoba ngühkung maibü kongkin tuokashi; ditmangsühlabü kongkin maibü tuokashi.

³Litnyu haana kümthünga seneibü lemnyet teklaang metashi.

⁴Aieilausi ho Israel shanga ngühkhüm che kia, Jakob Mühghaüeibü khangenan phobü song.

⁵Ladang hao Ijep kaodak ae haukei, ladang ngei angebü ngühyem che ditkei. Kheijinei aukabü che yingla haoei kho pienkei.

⁶“Haoeibü tak ka ngei on tonletkei; on khüka haoeibü ik sungentikei.

⁷Khonkujinei nyi kü to ngakei hoba ngei no püetkei, langmak huan kishang ka ngei ka to jongaikei, Meriba deia ngei no takteikei.

⁸O kü mütli, ditashi, hoba ngei ka la aukabü kulabü; O Israel, nyi kü la ngüha lekua ma!

⁹Ka to lubü Mühghaü aikei akijan, ayingsi nyi, küksithang lubü mühghaü ai alemjan.

¹⁰Ngo BUNYUBOU kaibü Mühghaü, aoei no Ijep kaodak ka leiyenkei; kaibü sembung yaang kaashi hoba ngei shentilabü.

¹¹“Lausikei kü mütliei ngeibü ngüha ale, hoba Israelei ngo lai apyokei.

¹²Hibü haoeneibü maangpon kaangbü phaito ngei haoen hautikei; khei haoen haoeneibü dambüa pailabü lele.

¹³O kü mütliei kü to ngüha lea tegüje, Israelei ngeibü lamnyua paia tegüje!

¹⁴Ngei haoeneibü dangbou tongde thükkhoulabü, hoba haoeneibü dangbou khulimbo ngeibü ik tuokkhoulabü.

¹⁵BUNYUBOU to mangsenbü shuong kho hao phang to attijan; hoba haoeneibü khonsak jihsiphai ponpen tethonkhoulabü.

¹⁶Toukei haoei whet youshou maibouthamei haoen sambhoulabü; hoba laang ka naodeiei ngei no maanga maitikhoulabü.”