Read Chang Naga NYENSANG CHIA 83 Bible Online

NYENSANG CHIA 83 - Chang Naga bible

NYENSANG CHIA 83

¹O Mühghaü, no khei ong teki; nyi ngüh lauashi, hoba sangsembo teki, O Mühghaü.

²Aieilausi kaibü dangbou shuongei lemenda; hoba ka to mangsenbü shuongei haoeneibü khu tonena.

³Kaibü mütli khulimbo haoenei huon amaibü kümda, hoba nyi kaplepan kibü khulimbo haoen ngühthangjamda.

⁴Haoenei laua, “Kaiya hoba haoen phang che ayeitiko leilutikho, khei Israel nyen touje adamenlabü lele.”

⁵Haü, haoen chela yeian maangangyoa, no khulimbo haoenei theyobü che küma.

⁶Edom si Ishmaelbü hameibü ba; Moab si Hagarbü.

⁷Gebal, Ammon hoba Amalek; Tairbü yoa Filistia.

⁸Assiriakei haoen yoa yoa; haoen Loteibü shisishousi shuong, Amonbü si Moabbü hau kibü thensilen shuong ki.

⁹Midianbü to tegü, Kishon shumanga, Sisera si Jabin to tegü, nyi haoen to jungeiashi.

¹⁰Aoyou Endora maukei, aoyou kao shanga odsinot la yeikei.

¹¹Haoeneibü yaangenbü Oreb tegü yeitishi; haü, haoeneibü songdakbü pendou Zeba hoba Zalmunna tegü yeitishi.

¹²Aoyouei laukei, “Mühghaü kishang kho senei shian apbo kaiya.”

¹³O ngeibü Mühghaü, soulangbü thamngu tegü, yeiei soulangbü youshou sho tegü haoen yeitishi.

¹⁴Yam wanei laakbü tegü hoba wanlongei shongh laakbü tegü.

¹⁵Kho tegü kaibü langtokei haoen shieiashi, hoba kaibü yeinakei mokde aptishi.

¹⁶O BUNYUBOU, haoenei kaibü nyen lamlabü lele haoeneibü thenyek himouei shentishi.

¹⁷Haoen himou bautiashi hoba ponpen shanga maang aptiashi; haü, haoen phenyemtiashi hoba mautiashi.

¹⁸Khei haoenei no ong, aoeibü nyen BUNYUBOU ki, kaodak pendoua Thükkabou dogo ngetiashi.