Read Chang Naga NYENSANG CHIA 86 Bible Online

NYENSANG CHIA 86 - Chang Naga bible

NYENSANG CHIA 86

¹O BUNYUBOU, kaibü nou kao aeto kaiyena, hoba kü to jongaikei; aieilausi ngo shalebü hoba akiale.

²Ngeibü langkei khümenan phoshi aieilausi ngei Mühghaü to souhatda; O no ngeibü Mühghaü, ka to mailembü kaibü sambü khümenashi.

³O BUNYUBOU, kü to sanoukai; aieilausi chalou sünga ngei ka to welauda.

⁴No khangenbou langkei olintiashi, aieilausi, O BUNYUBOU, ka jungto ngeibü welau angtida.

⁵Aieilausi, BUNYUBOU, no maibü hoba shedbü apbula lamlean ki; hoba ka to ngabü pendou to sanou dambüa apsileko kuda.

⁶O BUNYUBOU, ngeibü welau ditshi; hoba ngei subüjabü ditshi.

⁷Ngo khonkubü chaloua ngei ka to ngalabü, aishanga nyi kü to jongailabü.

⁸O BUNYUBOU, mühghaü shuong yoa no tegübü ao aki; tokei kaibü kümsilei tegü lubü ai aki.

⁹O BUNYUBOU, nyi kümbü phang pendouei louan ka thedanga khüpetlabü; hoba haoenei no soneikangtilabü.

¹⁰Aieilausi no yaangbü hoba seikümseilei kümda; no ong Mühghaü.

¹¹O BUNYUBOU, kü la kaibü lamnyu lenbü; kaibü ngühmaia ngo pailabü; kaibü nyen to souhatlabü shanga ngeibü maangpon papleptishi.

¹²O BUNYUBOU, ngeibü Mühghaü, ngeibü maangpon khümboei ngei no sanglabü; ngei kaibü nyen thonakiko soneikangtilabü.

¹³Aieilausi nyi kü to kaang sanoua; hoba phangkabou Sheol ka nyi ngeibü langkei khümena.

¹⁴O Mühghaü, ngo khulimbo lilisesebü meimeida, ikshatbü tan cheei ngeibü langkei shieia, hoba haoenei no weko aki.

¹⁵Lausikei, O BUNYUBOU, no sanoudambü hoba onoubü Mühghaü; khauangla maangyangsho, sanoudambü hoba ngühmaia apsileko.

¹⁶O kü jungto sepeiashi, hoba kü to onoukai, kaibü sambü la kaibü hau kuashi, hoba kaibü sambü saoeibü shou khümenashi.

¹⁷Ponpen shanga kü la tetsida lenshi, khei kü to mangsenbü shuongei kho hapan himou baulabü lele; aieilausi, BUNYUBOU, nyi kü to thuia hoba ngo haksotia.