Read Chang Naga NYENSANG CHIA 88 Bible Online

NYENSANG CHIA 88 - Chang Naga bible

NYENSANG CHIA 88

¹O BUNYUBOU, ngo khümenbou Mühghaü, ngei ka thedanga change nangnak pendou ngekda.

²Ngeibü welau ka jungto loutishi; ngei ngekbü nyi ditshi.

³Aieilausi ngeibü langkei khonsakei shenakei, hoba ngeibü langkei Sheol nyangko kia.

⁴Aoyou püngkhün to atda haoen yoa ngokei weyoda; ngo thuilabü akibü müt che la yeiakei.

⁵Haibü shuong yoa tekan apan, haitibü shuong heedanga yepan kibü tegü ao nyi touje adamenda hoba kaibü ikei haoen waptheda.

⁶Pendou to phangkabou püngkhüna nakthüh haüboua nyi ngo phokua.

⁷No maangpokbüei ngo sanglepda, hoba kaibü yungsen pendouei nyi ngo khon kutida.

⁸Ngeibü thangbou shuong kü jungka nyi lounyu kuktikei, haoen la ngo kho mangsenlabü che nyi yeitikukei; ngo khinlepakei hoba ngo alongenda.

⁹Khonkubüei ngeibü nyek yuijung ngaida, O BUNYUBOU, ngei chalou angboua ka to welauda; ka jungto ngei ngeibü ik shinga.

¹⁰Haibü shanga nyi seikümseilei kümlep lo? haibü shuongei langngaian no sanglep lo?

¹¹Heedanga kaibü sanoudambü ngekan jinkulep lo? ayingsi leiluan apbüa kaibü mailemenbü shanga lenlep lo?

¹²Nakthühbü kaoena kaibü seikümseilei shuong lenenlep lo? ayingsi nakthühbü kaoa kaibü saopobü damenlep lo?

¹³Lausikei, O BUNYUBOU, ngei ka to ngeka; hoba ngeyang ngeibü welau ka jungto loulabü.

¹⁴BUNYUBOU, nyi aila ngeibü langkei apyoda? kü ka kaibü thenyek aila sepeida?

¹⁵Ngo nashoudanga ka thama khonkuda hoba haida; ngo hatbümokbüei ngo khonkujinei ngo laialeda.

¹⁶Kaibü maangshat kaangbü ngo danko haua; kaibü hatlamoklabüei ngo waptheda.

¹⁷Chalou sünga dei tegü haoen loukei; haoenei ngo lemailela kailepbei.

¹⁸Nyi ngeibü maangjambü shuong hoba ngeibü sanoubü kü ka lounyu bangtia; hoba nakthühbü kho ngeibü jenabou la yeitikua.