Read Chang Naga NYENSANG CHIA 89 Bible Online

NYENSANG CHIA 89 - Chang Naga bible

NYENSANG CHIA 89

¹BUNYUBOUeibü üeisanou shanga ngei ponpen chia laulabü; meten pendou la no maanglemenbü shanga ngei kü sembungei ngekletkulabü.

²Aishanga ngei laua, onoubü kho ponpen thon akiko kümlabü; lolebü müha kaibü maanglemenbü kho nyi khangan phokuakei.

³Nyi laua, “Ngei pienbü yoa ngei theyobü che küma; ngeibü sambü Dawid to ngei theyolanyoa.

⁴Kaibü lilabü ponpen thon akiko ngei khangan phokulabü, hoba meten pendou shanga kaibü Choba setshang kümbulabü.”

⁵Hobaje, O BUNYUBOU, mühei kaibü kümsilei sangtiashi; saopobü kamsheibüa kaibü mailemenbü sangtiashi.

⁶Aieilausi müha kibü aoei BUNYUBOU to takteila thükkei? khuthüka kibü shuong yoa BUNYUBOU tegü ao ki?

⁷Saopobü shuong thangyena Mühghaü to aeibou hatlabü, hoba hao kaijembo kibü pendouei hao to hatlabü.

⁸O Thükenbü BUNYUBOU Mühghaü, no tegü BUNYUBOU, hau kibü ao ki? hoba kaibü maanglemenbü no kaijembo kia.

⁹Nyi yungnyu khauangbü shiletda; kho yungsen longjinei nyi khübü thaktida.

¹⁰Nyi Rahab haitibü che phatko netla yeiko leilutia; kaibü hauei kaibü dangbou shuong nyi lintia.

¹¹Khuthük kaibü, kaokei kaibü; kaodak hoba khünei kibü pendou, nyi khübü kümbei.

¹²Cha aenei hoba ap aenei, nyi khübü kho pakentikei; kaibü nyena Tabor hoba Hermon olinyoda.

¹³Nyi hau kibü phem che kia, sekokbü kho kaibü hau hoba kaibü mae ik kho loubü ki.

¹⁴Saopobü hoba ngühmai matjem kho kaibü Choba setshang chemshang, ka thedanga sanou hoba ngühmai hauda.

¹⁵Lemsilang ngühlang ditbü mütshuong haübou; O BUNYUBOU, haoenei kaibü thenyek ngesakbüa paida.

¹⁶Kaibü nyena haoen chaseko olinyoda; hoba kaibü saopobüa haoen yaangentida.

¹⁷Aieilausi haoeneibü hau soneikangbü kho no; hoba nyi maibü danko küneibü laang yaangenlabü.

¹⁸Aieilausi küneibü aih BUNYUBOUeibü; hoba küneibü Choba Israel Saopoboueibü.

¹⁹Kheijinei kaibü saopobü to nyi mangsanga joyokei, hoba laukei, “Hau kibü che thüka ngei khun phokua. Mütshuong yoka pienbü che ngei yaangentia.

²⁰Ngei ngeibü sambü Dawid hapena; ngeibü saopobü onangei ngei hao naangkuko piena.

²¹Hao yoa ngeibü ik thipyolabü; ngeibü ikeikei ngei hao hau kitilabü.

²²Dangbouei hao akhüpettilabü, ayingsi amaibou shou khoei hao ayantilabü.

²³Hobaje hao thedanga ngei hao khulimbü yantilabü; hoba hao to mangsenbü shuong to ngümlabü.

²⁴Lausikei ngeibü maanglemenbü hoba ngeibü sanoudambü hao yoa kilabü, hoba kü nyena haoeibü laang kho tonentilabü.

²⁵Tokei haoeibü ik kho yungnyu thüka, hoba haoeibü mae ik shumang shuonga ngei phokulabü.

²⁶Haoei kü to hai ngeklabü, ‘No kübou, ngeibü Mühghaü, hoba ngo khümenbü laang.’

²⁷Hobaje ngei hao kü shou jaishoubou yeitilabü, Tokei ngei kaonyudak kabü Choba shuong pendou yoa tonenbou yeitilabü.

²⁸Ponpen thon akibü ngeibü üeisanou ngei hao shanga phoan aplabü; hoba ngeibü theyolanyobü hao yoa aleilulabü.

²⁹Haoeibü lilabü khokei hoba khuthükbü chalou tegü haoeibü Choba setshang khokei; ponpen thon akiko nyi kitilabü.

³⁰“Haoeibü shousi shuongei ngeibü ngühkhüm apyoalonga, hoba ngei sakkubüa apailonga.

³¹Haoenei ngei lamlekubü ngühkhüm leilualonga hoba ngühkhüm shuong ajungeilonga.

³²Kheijinei haoeneibü shabü shanga kayang kulabü, hoba haoeneibü shedbü shanga ngei juei ngümlabü.

³³Lausikei ngeibü üeisanou ngei lemailela hao ka alanglabü. ayingsi ngeibü maanglemenbü ayantilabü.

³⁴Ngeibü thebülanbü ngei aleilulabü, ayingsi kü sembung ka angbü ajaksheilabü.

³⁵“Ngei saopobüei ngei che theyolanyoan phaiaje; ngei Dawid to ayepeilabü.

³⁶Haoeibü lilabü ponpen thon akiko kilabü; hoba kü thedanga haoeibü Choba setshang chanyu tegü kilabü.

³⁷Litnyu tegü kho ponpen thon akiko khangan phokulabü, hoba müha mailemenbü aukabü tegü kilabü.”

³⁸Lausikei nyi apa hoba achekngai, nyi pienbü thükto no khauang longa.

³⁹Kaibü sambü to theyolanyobü nyi mangsena; haoeibü Chobaeibü khun kho kao to attian nyi thama khoneikua.

⁴⁰Nyi haoeibü ba pendou leilutikua; nyi haoeibü lapheishon leilutikua.

⁴¹Danbü phaibü pendouei hao ka soshausoyungda; haoeibü lepbü sangmang thedanga hao mangsenlabü che yeia.

⁴²Nyi haoeibü dangbou shuongeibü mae ik yaangentia, nyi haoeibü dangbou pendou olintia.

⁴³Haü, nyi haoeibü in akbü thangetda, hoba lasona nyi hao kho alotilabü.

⁴⁴Nyi haoeibü son thaktia, hoba haoeibü Choba setshang kao to yantia.

⁴⁵Nyi haoeibü heshou langkei wapan apbua; nyi hao himouei shentia.

⁴⁶O BUNYUBOU, lalokche? Nyi no lolo ponpen thonakiko huan kilep lo? kaibü sei wan tegü lalokche longla?

⁴⁷O ngeibü chalou lai tuisho kho damenashi; müteibü shou pendou kongkongbüa kümbei!

⁴⁸Sheol sei ka jembü soushou senetlabü lele, kaodaka langkei kibü ao ühailabü ki?

⁴⁹BUNYUBOU, nyi maanglemenbü jihsiphai Dawid la nyi thekubü shaangbü üeisanou lanei ki?

⁵⁰BUNYUBOU, kaibü sambü shuong himou damenashi; hau yaangbü phang shuongei mangsenbü ngei ngeibü maanga lai natda.

⁵¹Laobou danko, O BUNYUBOU, kaibü dangbou shuongei mangsena; laobou danko nyi pienbou haushanga haoenei mangsena.

⁵²BUNYUBOU ponpen thon akibü haübou yingshi! Amen! hoba Amen!