Read Chang Naga NYENSANG CHIA 9 Bible Online

NYENSANG CHIA 9 - Chang Naga bible

NYENSANG CHIA 9

¹Ngeibü maangpon pendouei ngei BUNYUBOU sangkho; kaibü maangpanglabü kümsilei pendou shanga ngei sangkho.

²Ngo olinko hoba ka to lembho: O Thükkabou, ngei kaibü nyena nyensang chia laukho.

³Ladang ngeibü dangbou shuong sepeikei, haoen ka thedanga phaiyetkei hoba maukei.

⁴Aieilausi nyi ngeibü janbü hau hoba kü shanga senetan phokua; Choba setshanga setan nyi ngühmaanglanko matjemda.

⁵Nyi küksithang to haka, nyi amaibü mautia. Nyi haoeneibü nyen thon akiko haman apa.

⁶Dangbou shuong thonan apa, haoen thon akiko leilua. Hobaje nyi thükenbü sangnyu shuong, haoeneibü nyenshenkei maua.

⁷Lausikei BUNYUBOUeije thon akiko songdakda. Matjemla shanga haoei haoeibü Choba setshang lamlea.

⁸Hobaje haoei saopobüei kaodak matjemlabü. Haoei phangshuong ngühmaanglanko matjemlabü.

⁹BUNYUBOU kho tokei naklepbü shanga satenshang yaangbü, Hoba khonsak jiha satetlangshang.

¹⁰Hobaje aoyouei kaibü nyen ngekei, haoenei ka to maanglemlabü; aieilausi BUNYUBOU, nyi no lambü shuong ananglet.

¹¹Ziona kibü BUNYUBOU nyen sangashi, chia lauashi. Haoei kümbüleibü kümsilei shuong mütshuong yoa ngekletkushi.

¹²Aieilausi aoei sii shanga phoklamda haoei haoen damenda, shalebüei ngekbü haoei amada.

¹³Ngei Zion nouyangshou bakhüna, kaibü nyensang pendou lenlabü lele hoba ngo kaibü khümenbüa olinlabü lele;

¹⁴O BUNYUBOU, kü to onoukai! kü to mangsenbü dan ka hapshaubü ngeibü khonku to chühkai! Ngo haibü bakhün ka senenashi.

¹⁵Jembüei thubü püngkhün to phangshuong atetakei; haoenei sanbü sunga haoeneibü you minakei.

¹⁶BUNYUBOUei jembü lolo jembü shanga ngetia; haoei matjem kua, amaibü shuong lulueibü ikkümikleia mina.

¹⁷Mühghaü maabü phangkei pendou yoan, amaibü shuong Sheol to koulanglabü.

¹⁸Aieilausi akialebü ponpenje maan üplabü; hoba shalebüeibü maanglem thon akikoje amaulabü.

¹⁹O BUNYUBOU, meimeiashi, mütla tethükti, phangshuong ka thedanga matjemashi.

²⁰O BUNYUBOU, haoen hatbü lühbüa phokushi, phangshuong la haoen müt ong yingkei dogo ngetiashi.