Read Chang Naga NYENSANG CHIA 90 Bible Online

NYENSANG CHIA 90 - Chang Naga bible

NYENSANG CHIA 90

¹BUNYUBOU, meten pendoua no küneibü Mühghaü yingkuan loua.

²Shongh shuong ayeijinei, ayingsi kao hoba kaodakbü akümjinei, khei ponpen thonakibü chalou ka no Mühghaü kia.

³Nyi müt thamngula yeitida, hoba lauda, “Kan müteibü shousi shuong longeiashi.”

⁴Aieilausi ka thedangaje po hajar che kho miet tegü ong ki; hoba nangnak lapheibü che tegü.

⁵Yungsenei tegü nyi haoen phonglangda; haoen manghlibü che tegü, ngeyang haoen sang che yembü tegü.

⁶ngeyang kho chingan pungda, chasem kho yuida hoba haida.

⁷Aieilausi kaibü seiei kün lonshemda, hoba kaibü khauangei kün lai aleda.

⁸Küneibü shabü nyi kün thedanga phokua; küneibü huphang shabü ka the ngesakbüa kia.

⁹Aieilausi kaibü khauanga küneibü salang pendou dankhümda. Hak che tegü küneibü salang künei thontida.

¹⁰Küneibü salang po anjinlei; ayingsi salangko kiasikei saolei ong, khei yingsikei haoen insing kho khei khonku hoba maangshat ong; aieilausi kho tongde thonda, hoba kün pilangda.

¹¹No khauangbü hau hoba ka to hatlabü kho latetche, kaibü khauang kho khütetche, kho aoei ngela thükla?

¹²Künei songsido kibü maangpon che haplabü lele küneibü langkei salang chalou weenla lenbü.

¹³O BUNYUBOU, sepeinyu kangaia; lalokche kila? kaibü sambü shuong shanga kaibü dambü jaksheiashi.

¹⁴O kaibü üeisanouei ngeyang kün maanga maitiashi, khei künei langkei salang sünga olindang lelabü lele.

¹⁵Nyi kün khonkutibü thüng, hoba küneibü shabü po shuong thüng, nyi kün olintishi.

¹⁶Kaibü sambü jungto kaibü kümsilei hoba kaibü shousishuong junga kaibü soneikangbü tang khittiashi.

¹⁷Hobaje küneibü Mühghaü BUNYUBOU, kaibü maanghaibü kün thüka kishi; hoba kün thüka künei kümenbü kümsilei hau kitiashi; haü, künei kümenbü kümsilei kümshoktikai.