Read Chang Naga NYENSANG CHIA 91 Bible Online

NYENSANG CHIA 91 - Chang Naga bible

NYENSANG CHIA 91

¹Ao Thükkabou satenshanga kida, hao pendou Thükenbou yeme phanga kilabü.

²BUNYUBOU shanga ngei ho laulabü, “Hao ngo satenshang hoba ngeibü lapheishon; ngeibü Mühghaü aoto ngei mailemda.”

³Aieilausi ausanbüeibü sung ka, hailabü limsilang ka, haoei no khümenlabü.

⁴Haoeibü kaakei no kapletlabü, hoba haoeibü kaakphanga no satenlabü; hao ngühmai aih hoba aihkung tegü.

⁵Nangnak hatlamoklabü kho; ayingsi chaloua seengjung satbü laujin kho haoei ühütlabü;

⁶ayingsi nangnak paibü lim, ayingsi chajihboua leilubü longtibü nyi ühütlabü.

⁷Ka thedanga hajar che hoba kaibü mae aenei hajar an tuonglabü; lausikei kho no khulimbo aloulabü.

⁸Kaibü nyekei ong haplabü, hoba amaibouei ku kho haplabü.

⁹Aieilausi nyi laua, “BUNYUBOU ngo satenshang, Thükkabou kho ngo kishang.”

¹⁰Hibü shabü aieikei no asühlabü, ayingsi kaibü neichem nyangko limsilang aikei aloulabü.

¹¹Aieilausi no haushang pendoua khümenlabü lele haoei khuthük hangangbüla ngühkhüm kulabü.

¹²Laanga, no you kühbüla dogo, haoenei no haoeneibü ika tonletlabü.

¹³Nyi molosaonyu si pinyu thüka nakeilabü, kaibü youei molosaonyu paang hoba pinyu kho naknyinkulabü.

¹⁴“Aieilausi haoei kü to sanouabü ngei hao khümenlabü, haoei ngeibü nyen shenabü ngei hao thükaenei settilabü.

¹⁵Haoei kü to welaubü hoba ngei hao to jongailabü, khonsak khonkua ngo hao yoa kilabü; ngei hao khümenlabü hoba soumo kulabü.

¹⁶Salang lounyu kuan ngei hao maanga maitilabü, hoba ngeibü khümenbü hao la lenlabü.”