Read Chang Naga NYENSANG CHIA 94 Bible Online

NYENSANG CHIA 94 - Chang Naga bible

NYENSANG CHIA 94

¹BUNYUBOU, no Mühghaü, aoeibü ika phoklambü ki; no Mühghaü, aoeibü ika phoklambü ki; kaibü thenyek ngesakashi.

²Kaodak matjemashi, no lolo meimeiashi; Lilisesebü la haoenei haplabü kuashi.

³O BUNYUBOU, amaibü shuongei lalokche, amaibü shuongei lalokche thük hapla?

⁴Haoenei lauda, haoenei lilikhuia lauda, shabü kümbü shuong pendouei haoen lolo lilida.

⁵O BUNYUBOU, haoenei ka mütshuong ngünnyinda, hoba kaibü phetphan shieikoeda.

⁶Haoenei latnyu si yenbou haitida; hoba shoujit shale shuong haitida.

⁷Hobaje haoenei lauda, “BUNYUBOUei ühüplabü, ayingsi Israel Mühghaüei aditlabü.”

⁸Müt yoa kan ngoubü shuong, ditenashi; hoba kan jimakibü shuong ladang ong songsido kila?

⁹Aoei nou yembukei, haoei aditlep lo? Aoei nyek kümbukei haoei ühüplep lo?

¹⁰Aoei phangshuong matjemda, khei aoei mütla songsido lenda, haoei ühaklep lo?

¹¹BUNYUBOUei müteibü dambü ngeda, aieilausi haoen hak kong.

¹²O BUNYUBOU, nyi ao to hakda, hoba kaibü ngühkhüm ka lenda hao haübou.

¹³Khei amaibü shanga püngkhün athushongko khonsak khonku chaloua nyi hao la hakso kuda.

¹⁴Aieilausi BUNYUBOUei jembü mütli nangan üplabü, ayingsi haoeibü phet ainletlabü.

¹⁵Aieilausi matjembü kho saopobü aeto ngailabü; hoba maangpon tangbü pendouei kho phaito haulabü.

¹⁶Amaibü kümbü khulimbo kü shanga ao lola? shabü kümbü khulimbo kü shanga ao lola?

¹⁷BUNYUBOUei kü to athui tegüje kü soushou haian kikhoulabü.

¹⁸“Ngeibü you shekda,” dogo ngei ladang laukei, kaibü üeisanouei, O BUNYUBOU, ngo phonkei.

¹⁹Ngeibü maangpon sensen maangmau yaangsepa; kaibü haksoei ngeibü soushou olintida.

²⁰Shabü Choba setshang laobouei shabü ngühkhüm yeitida, kho ka to thangjam kilep lo?

²¹Saopobü soushou khulimbo haoen liko kamsheida; hoba shedbü akibü sii phinda.

²²Lausikei BUNYUBOU ngeibü lapheishon suokbü. hoba ngeibü Mühghaü ngo satenshang laang.

²³Hobaje haoei haoen thükto jembü shabü loutia, hoba haoen jembü shabüa wapthetlabü; küneibü Mühghaü BUNYUBOUei haoen wapthetlabü.