Read Chang Naga TETENTANBÜ 1 Bible Online

TETENTANBÜ 1 - Chang Naga bible

TETENTANBÜ 1

¹Israel Choba, Dawid shou Solomon tetentanbü.

²Hanei kibü tetentanbü ngühshuong khoei, songsido songlen maibü hoba ditenko laubü ngühtet haübü shenla ngela ka to thuilabü,

³khübüei no lai sangkodoko maanglan, ngühmai hoba hinseibüa kila lenla thüklabü,

⁴khübüei asangadobü shuong sangtidotila hoba mütao shuong hapbü ngebüa lai haati yaangtila lenla thüklabü.

⁵Khübü tetentanbü khoei songsido kibü shuonglakei hapbü ngebü jinyokula thükkei, hoba weendoenbü shuongkei lam leilabü,

⁶hibü khübüei tetenbü huphang ngühtet shuong hoba songbüdobü shuongei phenyembü longtibü haoenei ditentila thüklabü.

⁷BUNYUBOU to soumo hatbü kho songsido khangshang, lausikei soungouabü mütshuongei hapbüngebü hoba songlen mangsenda.

⁸Küshou, kanyu si kabouei songlenbü ngüha leashi.

⁹Haoeneibü songlenei kaibü thechüh maiboula yeibüei kaibü khua khun ayingsi kaibü ngüma chisiyakei jantibü phatko kilabü.

¹⁰Kü shou, ladang shabü mütshuongei no takteilaje nyi ngüha tele.

¹¹Tetlabüei haoenei hai lauda, “Kaiya, senei müt at haitila lambho, senei ai ashedbü müt at louyola lapbho.

¹²Heeei tegü senei haoen pemtolo suiakho, hoba püngkhün to atbü shuong phatko,

¹³senei namsek peisilei pendou haplabü, hoba soletbü peisileiei seneibü chem shenlabü.

¹⁴Kaiya, hoba kün yoa yoshi, hoba künei kokbü nama hamashi.”

¹⁵Kü shou, kho tegübü mütshuong yoto tohau, haoeneibü lam ka kukashi.

¹⁶Haoenei amaibü akümshongko haisühla athükda; haoenei ponpen sii angtila ong lamlean kia.

¹⁷Au sanla haujinei auei hapbo sung sanbü kho ku aki.

¹⁸Kho tegü mütei jembü minngaila sung sanda, haoen jembü langkei shanga la thoda.

¹⁹Soshau soyungbouei ponpendou soshau soyungbou langkei lamda, kho tegü ik shatbü müteibü langkeia haüthükda.

²⁰Ditshi! Songeihonei khongnyua hoba namyakshanga ngekko ngada.

²¹Sangnyu bakhün laobou ka mütshuong louda khünei ngekda.

²²Kan ngoubü shuong! kan lalokche ngouan kimangsühda? hoba nyikubü shuongei hapbü ngebü to nyikubüa lalokche olinla? kanei hapbü ngebü mangsenda.

²³Kanei ngei hakbü to ditshi; ngei kan la thungei jangeibü maibü kulabü hoba ngeibü songsido kan to janyolabü.

²⁴Ngei kan loula huiko ngasi kanei aditku, kanei kü to maang atak.

²⁵Hobaje kanei ngeibü songlen ponpen wela ale, hoba ngei kan tangtikubü lemang asüh.

²⁶Hibü kan thushed to atjinei ngei thükto nyikulabü, hoba tokei kan jungto hatbümokbü loujinei ngei kan la nyikulabü.

²⁷Ladang kan jungto yeithuyeinak hoba yeishik thushed khonsak yaang loulaje;

²⁸kheijinei kanei ngo ngalabü, lausikei ngei ajongailabü; kanei ngo maangtakko lamlabü lausikei kanei ngo ühüplabü.

²⁹Aishanga kanei songsido mangsenkei hoba hanghangko BUNYUBOU to ngüha ale.

³⁰Kanei ngeibü songlen ladangkei lemang asüh hoba ngei tangtikubü che ongkei maangkuko asunglet.

³¹Hibü kanei kümenbü hek kanei shaulabü hoba kan jembü kümeileiei shatlabü.

³²Aishanga songlanbü shuong haoenei songsido asungletbüei haida, hoba ngoubüloubü shuong asangadoko helelea kibü khoei maulabü.

³³Lausikei aoyouei kü to nou haangkulaje püetshang haplabü hoba hatlabü aikei akiko ongatham kilabü.