Read Chang Naga TETENTANBÜ 10 Bible Online

TETENTANBÜ 10 - Chang Naga bible

TETENTANBÜ 10

¹Habü ho Solomoneibü tetentanbü: Songsido kibü shouei bou the lenentida; lausikei ngoubü cheei haonyu maangpon sha letida.

²Ngühmaang alanbüei sungbabü nyaksinam kho ai ku aki; lausikei saopobüei kaibü langkei khümenlabü.

³BUNYUBOUei saopobü shuong müh aphoda, lausikei shabü shuong maangdak kho haoei apbulabü.

⁴Haulo haushedei no shale phamtilabü, lausikei haujembo kümbüleibüei keitida.

⁵Maangsangbü mütei sulanga langle yoshaida; lausikei ao youlat jiha yepda haoei kongbü haplabü.

⁶Saopobü müteibü khua haülabü kia, lausikei shabü shuong sembung lemenleenbüei shenan kia.

⁷Saopobü shuong damenbü kho haülabü che; lausikei shabü shuong maan aplabü.

⁸Maangsangbü mütei songlen maibü sungletda, lausikei ao- youei ngoualoua ngüh angda, kho leilulabü.

⁹Maanglanbü mütshuong püet angetshang kia, lausikei aoei sepeisaida hao lapenlabü.

¹⁰Aoei nyek sheman lenda haoei khonsak longtida, lausikei aoei tangshaitham maang kaangko hakda haoei sangmai kümda.

¹¹Müt maibüeibü ngüh langkei deikük, lausikei müt amaibüeibü ngüh kho lemenleenbüei shenakei.

¹²Mangsenyobüei oyophetyo longtida; lausikei sanouei shedbü pendou küpletda.

¹³Ditenbü kibü sembunga songsihon kia, lausikei soungouabü müt to ngümla muakei.

¹⁴Songbüdobü mütei hapsinge thanda, lausikei ngoubü shuongei huon kümbüa khonsak kia.

¹⁵Nyakeinamei keibou khümenda; shale kho shalebou mautibou.

¹⁶Maibü kümbüeibü ku kho langkei, lausikei shabüei aei shabü to leida.

¹⁷Mütshuong aoyouei tangtibü to ngüha leda lang kilabü, lausikei aoyouei asungletda haoen thusheda kia.

¹⁸Müt aoei mangsenbü huan phoda hao yepeijawebü, hoba ngühsak neptibou kho ngoubü.

¹⁹Aoei ngüh juong lauda khoei shabü aei shonda, lausikei songsido kibü mütei ngüh küpjemda.

²⁰Saopobü müteibü ngüh kho chandinam phatkei; lausikei shabü shuong dambü kho lejim aki.

²¹Saopobü müteibü ngühei müt juong samda; lausikei ngoubü shuong haoen jembü lolo haingaida.

²²No keitibü kho BUNYUBOUeibü haülabü. Haujembo kümbüei no keila athük.

²³Shedbü kümbüa olinlabü kho ngoubü kümsilei, lausikei songbüdobü mütshuong songa- hona maangamaida.

²⁴Saopobü mütshuongei haoenei mangsühbü hapda, lausikei shabü mütshuongei haoen ai to yongko hatda kho haoen to yinglabü.

²⁵Yeinak louda hoba shabü mütshuong soulangda, lausikei saopobü mütshuong ponpen shanga khümenda.

²⁶Hauh shanga haijepbü hoba nyek shanga wankhük tegü, haulo haushedbü müt ka shanga lejim akibü yeilabü.

²⁷BUNYUBOU ngüha leashi, hoba no salangko kilabü, lausikei müt amaibü shuong haoeneibü jih asühko haida.

²⁸Saopobü mütshuong maanglem kho olinbüa thonda, lausikei shabü mütshuong maanglem ai ayeiko apda.

²⁹Maangtangbü shuong shanga BUNYUBOU lam kho satenshang, lausikei shabü jungeibü shuong shanga leilubü ki.

³⁰Saopobü mütshuong ponpen püetshang kia, lausikei shabü mütshuong kaonyek khonei akilabü.

³¹Saopobü mütshuongei songbüdobü ngüh lauda, lausikei yepeijawebü lishang lipan apbulabü.

³²Saopobü mütshuongeibü sembung ka janngüh angda, lausikei amaibü shuongei ponpendou alualak ngüh ong angda.