Read Chang Naga TETENTANBÜ 11 Bible Online

TETENTANBÜ 11 - Chang Naga bible

TETENTANBÜ 11

¹BUNYUBOUei maang alanbü takbü yaübü jungeibü mütshuong mangsenda, haoei ngühmai takbü yaübü jungeibü to olinda.

²Mütshuong aoyou yonglamda haoenei himou hapda, lausikei eaaoa kibou jungto songsihon louda.

³Maangtangbü ditenbü khoei haoen leilabü, lausikei huonbü- youbü shuong haoen khüpsilangei haoen maulabü.

⁴Haishat lapnyet nyakeinamei no akhümenlabü, lausikei saopobüei no khümenlabü.

⁵Ngühmaanglanbüei müt maibüeibü langkei lam hopatham yeitida, lausikei müt amaibü hao jembü shedbüei atetlabü.

⁶Maangtangbü saopobü khoei hao püetlabü, lausikei khüpyo langyobü shuong kho jembü maangalemenbü si shabü maangdüha lapenlabü.

⁷Ladang müt amaibü haida, haoeibü maanglem hao yoa haida; nyakanama maanglem phobü kho ai lejim akiko apda.

⁸Saopobü müt kho thushed ka püetda, lausikei amaibou la kho jeikuda.

⁹Mühghaü to ühütbü mütei haoeibü sembungei lepbü sangmang leilutida, lausikei saopobü songeihonei no khümenlabü.

¹⁰Saopobü mütshuong thusinaang maibüa sangnyu che olinyoda; lausikei ladang shabü shuong haida olinbüei ngekda.

¹¹Saopobü mütshuong haülabüei sangnyu kho tonenda, lausikei amaibü ngühsideiei sangnyu kho phetnyintida.

¹²Mü nyikuko awealauko ngüh angbü müt kho ngoubü, lausikei ditenbü müt küp jemetnyu kida.

¹³Ngüh phakbü müt la aoeikei huphang ngüh lenla maanglem akida, lausikei maang lemenbü müt che la nyi maanglem phola thükkei.

¹⁴Songsido kibü leiyeibü akilonga phang che tuongda, lausikei chemphang songlen souko kibüa mütshuong satetlangda.

¹⁵Müeibü sanghshemla theletbü müt kho onat maangmau kia, lausikei sanghayunga ayobü kho maibou.

¹⁶Onou kakbü yaksa kho soumo kia, lausikei üeisanou akakbü yaksa kho himou kia. Haulo haushedbü mütei ladangkei nyaksinam ühüplabü, lausikei sekokbü mütei nyaksinam hapda.

¹⁷Themai maangmai mütei pailetbü hapda, lausikei sanou akakbü müt jembü lolo kongda.

¹⁸Amaibüei shabü mu hapda; lausikei saopobü wenbouei tükde jongsak hapda.

¹⁹Laobou müt tangbüa kaangkhühtham loan ki hao lang kilabü, lausikei aoei amaibü shieida hao hailabü.

²⁰BUNYUBOUei shabü sensimaang yembü mütshuong mangsenda; lausikei tangko kümbü shuong sanouda.

²¹Shabü mütshuong shieikoelabü haang dogo nyi ngejan; lausikei saopobü mütshuong satenlabü.

²²Daman achühbü hesisao maibü yaksa kho ukeibü kungshema honeibü chinam saübü phatkei.

²³Müt maibü shuongei maangdakbü kho maibüa ong loushetda; lausikei müt amaibü maanglem kho khauang maang- pok ki.

²⁴Müt cheei amakhetko kuda, lankei aei ong keida; lubü cheei aeibou shikko khaiko kujankei akuko senetan phoda, lausikei shale ong phamda.

²⁵Maimang sühbü langkei kho kiti keitilabü; aoei dei lakkuda haolakei dei lakngaikulabü.

²⁶Aoei namyak nguibü haiteiko nyak ayaakko thanan phoda, mütshuongei khükda uokda, lausikei aoei yakkuda haoenei hao sangda.

²⁷Hautaknepbo maibü lambüei onou lamda; lausikei aoei shabü lamlaje kho hao jungto loulabü.

²⁸Aoyouei jembü nyaksinam to maanglemlaje pik tegü yuilabü; lausikei saopobü shuong sulang bunyem tegü naang mailabü.

²⁹Aoyouei jembü chemdang khonsaktida, haoei yei phet phanlabü; hoba ngoubou kho sangbüdobüeibü sambü la yeilabü.

³⁰Saopobü shuong hek kho langkei bunyu; hoba aoei soushou leibada kho songsido kibü.

³¹Chühashi, saopobü shuong la kaodaka jongsak kualonga; leilubü hoba shabü mütshuong tükde shieikoelabü dogo nyi ngejan.