Read Chang Naga TETENTANBÜ 12 Bible Online

TETENTANBÜ 12 - Chang Naga bible

TETENTANBÜ 12

¹Aoei tangtibü mangsühda haoei hapbü ngebü sanouda; lausikei tangtibü mangsenbü kho soungouabü.

²BUNYUBOUei müt maibü shuong to maangshikda; lausikei shabü huonsiyou jungbü shuong haoei attida.

³Amaibüei müt kishang atangda; lausikei saopobü shuong pheienla athükda.

⁴Yak maibü che kho laoeibü Choba khun; lausikei himou bautinyu kho haoeibü loa mon bungbü phatkei.

⁵Saopobü shuong kümthen kho ngühmai; lausikei amaibü shuongeibü chemphang songlen kho khüpettibü.

⁶Müt amaibü shuongeibü ngüh kho sii angtimang sühbü; lausikei ngühlau tangbüei haoen khümenda.

⁷Shabü shuong kho tekan apda hoba akiko apda; lausikei saopobü chemdang kho lolabü.

⁸Müt che haoeibü songsido thüng sanglabü; lausikei khüpbü langbü maangpon yembü kho mangsenlabü.

⁹Yaangbü che tegü lenan shausiyung akibü toje jembü langkei shanga kümbüleibü takübü müt che kho maibou.

¹⁰Saopobü mütei jembü shatsinam, samkeisamuk thounouda; lausikei müt amaibüei sanouko kümbüleibü kho kombü ong.

¹¹Aoei jembü sek mouda haoei shausiyung souko kilabü; lausikei aoei amlangbü kümsilei phai semeida hao ditenbüa shaleakei.

¹²Shabü mütshuongei müt amaibüei soletbü kho mangsühda; lausikei saopobü shuongeibü li khoei lang heklabü.

¹³Müt amaibou kho hao hao lolo haoeibü ngüha minngaida; lausikei saopobü shuong khonsak thushed ka satenda.

¹⁴Kaibü jongsak kho kaibü ngühanga hoba kaibü kümaleia thonakei, nyi ai kümbei kho nyi hapngailabü.

¹⁵Ngoubüloubü mütshuongei jembü lolo tangan damda; lausikei songsido kibü mütshuongei songlen to nou haangda.

¹⁶Asangadobü che weneibü kho tongde ngean apda; lausikei sangbüdobü mütei nyikubü weko aki.

¹⁷Ngühmai laubouei aukabü tükde kuda; lausikei amlangbü aukabü cheei khüpbolangko lauda.

¹⁸Daman achühko laubü ngüh khoei inlou tegü haüko aktida; lausikei sangbüdobü ngüh khoei mou maitida.

¹⁹Yepeijawebü kho longche shanga ong; lausikei ngühmai kho ponpen shanga kida.

²⁰Aoyouei shabü huon takda haoeneibü maangpon khüpbülangbü ki; lausikei aoyouei maibü takda maibü haplabü.

²¹Saopobü mütshuong thükto leilubü aikei alotlabü; lausikei amaibü shuong thushed ong kilabü.

²²BUNYUBOUei yepeijawebü sembung lishang mangsenda; lausikei aoyouei haoeibü ngüha leda haoen to olinlabü.

²³Sangbüdobü mütshuongei haoenei ai ngekei kho küpjeman phoda; lausikei haang alongbü mütshuongei haoen jim akibü ngekda.

²⁴Sonanepbü ikei ngühkhüm junglabü; lausikei haulobü müeibü aaola lean thonda.

²⁵Maangmau onatei ka ka olinbü solangda; lausikei sanou ngühei olintida.

²⁶Saopobü müt kho jembü lepbü sangmang lamleibou; lausikei amaiboueibü lamnyuei haoen mashiktida.

²⁷Haulobü mütei ai alapoulabü; lausikei namsek nyaksinam kho sonanepbü shuongeibü.

²⁸Saopobü lamnyua langkei kia; lausikei shedbü lamei haibü aeto leida.