Read Chang Naga TETENTANBÜ 13 Bible Online

TETENTANBÜ 13 - Chang Naga bible

TETENTANBÜ 13

¹Songbüdobü shouei hao boueibü songlen ngüha leda; lausikei yonglam lilibü mütei haoeibü hakbü asungletda.

²Mütei jembü sembung kabü hek shaulabü; lausikei khüpbü langbü mütei oyophetyo maangdakda.

³Aoei jembü sembung thepetda haoei jembü langkei senetda; lausikei aoei haa yaang koulaje haoei maubü haplabü.

⁴Haulo haushedbü mütei latet lai mangsühsikei ai akida; haoei kho ladangkei ühüplabü; lausikei haujembo kümbüleibü mütei haoei mangsühbü ajanjan pendou haplabü.

⁵Maanglanbü mütshuongei ye- peijawe mangsenda; lausikei müt amaibü shuongei himou longtida hoba ngühthem hapshauda.

⁶Maangtangbou kho haoeibü lama saopobüei kapda; lausikei shabüei amaibou kho pekan apda.

⁷Müt atei akinyu keibü tegü lenda; lausikei lubü shuongei aeibou keian haoen lolo shalebü tegü lenda.

⁸Keibü müt cheei haoeibü langkei angla haoeibü nyaksinam jungeida; lausikei aoeikei shalebou to ühütlenda.

⁹Saopobü shuong ngesakbüei shaü shaü ponponko ngesakda; lausikei amaiboueibü hantin kho nyetlabü.

¹⁰Yonglambüei oyophetyo ong longtida; lausikei songlen sungletbü kho songbüdobü.

¹¹Sosotham hapbü nyaksinam kho sosotham maulabü; lausikei hükomangko thanshaibü nyaksinam kho aei haalabü.

¹²Sanglepbü maanglem khoei maangpon shat taktida; lausikei mangsühbü onlangbü kho langkei bunyu.

¹³Aoei ngühmai mangsenda haoei jembü lolo maubü sungbada; lausikei aoei ngühkhüm to hatda hao la jongsak kulabü.

¹⁴Songbüdobü songlen kho langkei deikük, haoenei no langkei thushed ka satentilabü.

¹⁵Maangli maangsangei soumo pailetda; lausikei maang alemenbü kho leilubü lama kia.

¹⁶Tedtangbü mütshuongei haoenei mokümtoua thedangto damanchühda; lausikei ngoubüloubü mütshuongei haoen asangadobü phakda.

¹⁷Maanglem akakbü ngühthonbü shuongei khonsak longtida; lausikei maang lemenbü ngühthonbü shuongei solo sungbada.

¹⁸Tangtibü asungletbou khoei shale hoba himou haplabü; lausikei aoei tangtibü to ngüha lelaje sangjan.

¹⁹Nyi mangsühbü hapbü kho lai maikei; lausikei ngoubüloubü mütshuongei shabü ka sepeimang asühda.

²⁰Songbüdobü müt to yangashi hoba nokei songbüdobü la yeilabü; lausikei ngoubü to thangbou lamalonga no leilulabü.

²¹Thu amaibüei shabü mütshuong shieida; lausikei saopobü mütshuong la naangmaibü janletkuda.

²²Müt maibüei shilashoula nyaksinam phetsihek phoyokuda; lausikei shabü mütshuongeibü nyaksinam saopobü mütshuong shanga thankuda.

²³Shaleboueibü sek ka shausiyung apsileko longtila thükakei; lausikei maangalanbü danko kho kulangda.

²⁴Ka shou to ühakangüm longa nyi hao asanouda; lausikei hao to sanoua longa nyi hao to hakashi.

²⁵Saopobü mütshuong luluei shaumang yungmang sühbü souko aoko kia; lausikei müt amaibü shuong shi ashenda.