Read Chang Naga TETENTANBÜ 14 Bible Online

TETENTANBÜ 14 - Chang Naga bible

TETENTANBÜ 14

¹Songsihon kibü yaksaei jembü chem dangda, lausikei ngoubüei kho saoeibü ikei leiluda.

²Aoei tangbü lama paida haoei BUNYUBOU to soumo hatda; lausikei jembü lama ao khüpbü langbü ki, haoei hao mangsenda.

³Ngoubü ngühangei hao thükto ngümbü sungbada; lausikei songbüdobü sembungei haoen püetda.

⁴Sek shapbü masu pongsu akishanga bung kong ki; lausikei masu pongsueibü hauei nyak juong longtida.

⁵Maanglemenbü aukabüei hanghangko ngühmai lauda, lausikei ngühmaang alanbüei yepeijaweko ong lauda.

⁶Mü awealaubü müt ladangkei asangadolabü; lausikei sangbüdobü mütei sosotham ditletda.

⁷Ngoubüloubü müt ka kukashi, aieilausi nyi hao ka aikei aditletlabü.

⁸Thittit sangsangbü müt aila sangdadoda? aieilausi haoei ai kümlaje ngeda. Hangalongbü müt che aila ngoudalouda? aieilausi haoei ai ngekei kho ong damda.

⁹Mühghaüei amaibou kho nyikuda; lausikei maangtangbouei haoeibü onou hapda.

¹⁰Olinbükei lulueibü, hoba khauekbükei lulueibü; aoeikei khübü khüto janyola athük.

¹¹Müt amaiboueibü chem kho leilulabü; lausikei maangtangbou khoeibü neichem kho naangmailabü.

¹²Müt thedanga tükde phatbü lamnyu che kia; lausikei ho thonbüa haibü lamnyu.

¹³Ekyo nyiyobüa kei khauang maangpok kia, hoba olinbü kho thonlaje maangshat kia.

¹⁴Müt amaibü shuongei haoenei ai kümbei kho hapngailabü; lausikei müt maibüei haoeneibü kümsilei maibü jongsak haplabü.

¹⁵Soungouabü mütei mangthembü ngüh to kei mailemda; lausikei tedtangbü mütei haoeneibü younak to sepeinyu chühngaida.

¹⁶Songsido kibü mütshuongei khonsak thushed ka kukan maangsangko kida; lausikei ngoubü shuong asangadoko kida, hoba amaibü panteiko küman apda.

¹⁷Maang toktokbü mütei ngoubüloubü kümsilei kümda; lausikei songbüdobü mütei haisühda.

¹⁸Angeadobü haoen ngoukolouko kümbü thüng phet phanlabü; lausikei sangbüdobü shuong kho songeidoei khun hanlabü.

¹⁹Müt amaibü shuong müt maibü shuong thedanga hoba shabü shuong saopobü thedanga khüpetlabü.

²⁰Shalebü aokei khei hao lepbouei ongkei amangsühda; lausikei keibü thangbou juong kia.

²¹Aoei jembü lepbou to mangsenda, haoei shabü shonda; lausikei aoei shalebü to sanouda hao haübou.

²²Aoei shabü huon takda haoei shabü shonda aying lo? Lausikei huon maibü takbü phejan kho üeisanou hoba maanglemenbü.

²³Kümaleiashi hoba khoei no lang kilabü; lausikei ngühkong shambo sedalonga no shale ong phamlabü.

²⁴Songbüdobüeibü nyaksinam kho haoeneibü khun; lausikei ngoubü ka ngoubü ong loushedda.

²⁵Ngühmai aukabü lenbüei langkei shuong püetda; lausikei aoei amlang ngüh lauda haoei mütshuong huonettida.

²⁶Aoei BUNYUBOU to soumo hatda haoei satenshang lapheishon kia, hoba haoeibü shousinasi satenshang kia.

²⁷Nyi BUNYUBOU to soumo hatalonga kho tegübü khoei hailabü sung ka satentila thükkei.

²⁸Mütshang yaangbü kho Choba soneikangbü; lausikei eikshuong akilonga Choba kho amlang.

²⁹Natenbü müt khoei ditenbü yaang kia; lausikei toktokbü müt khoei ngoubü shangshentida.

³⁰Küpjembü maangponei mangasaoa shatsinyat ataktida; lausikei nyekto shatbüei lomakshat bautida.

³¹Aoei shalebü shieikoeda, jembü Kümbou nyikuda; lausikei aoyouei khambü to sanouda haoei Mühghaü hangenda.

³²Müt amaibü shuong haoeneibü kümsilei amaibü ka haoen lolo yanda; lausikei müt maibü shuong haoen jembü maangtakbüei püetda.

³³Sangbüdobü maangpon wekoa songsihon ngütakei; lausikei ngoubü shuongei songsihon shangabü angekei.

³⁴Saopobüei phang che tonenda; lausikei ai phang yinglaje yingashi shabü kho himoulabü che.

³⁵Tangko janko kümbü haoeneibü khangenbü shuong to Chobaei maangshikda; lausikei athük lottibü shuong to hao khauang maangpok kia.