Read Chang Naga TETENTANBÜ 15 Bible Online

TETENTANBÜ 15 - Chang Naga bible

TETENTANBÜ 15

¹Eaaoa jongaibüei khauang sotida; lausikei shoulobü ngühei maangpok khangtida.

²Ladang songbüdobü mütshuongei ngüh lauda, hapbüngebü senshaida; lausikei jim akibü mütshuongei asangadobü ngüh lauda.

³BUNYUBOUei senei amai maibü kümbü pendou sen to ai haüthükda chühko kia.

⁴Sanoubü ngüh kho langkei bunyu; lausikei phaklakbü ngü- hei soushou phetnyintida.

⁵Ngoubüei bouei tangtikubü mangsenda; lausikei aoei hakbü to ngüha leda hao maangsangbü shou.

⁶Saopobü mütshuongeibü chema nyaksinam juong kia; lausikei müt amaibü shuongeibü pailetbü khonei thushed kia.

⁷Songbüdobü mütshuongei hapbüngebü wenda; lausikei ngoubüei khei akümda.

⁸BUNYUBOUei müt maibü shuongei welaubü to olinda; lausikei müt amaibü shuongei lembüsabü mangsenda.

⁹BUNYUBOUei amaibü mütshuongeibü lamnyu mangsenda; lausikei saopobü phai sembü to hao olinda.

¹⁰Nyi amaibü kümalonga no maangshat lamlam shieikoelabü; nyi no lolo atangngai longa hailabü.

¹¹Yemsang mangkei BUNYUBOU thea shimdean kianyu, kholonga müteibü maangpon Mühghaü ka huenlep si!

¹²Mü nyikubü mütei tangtibü amangsühda, haoei ladangkei mü songbüdobü müt ka songlen aleda.

¹³Olinbü maangponei thedang ngesaktida; lausikei maangmau maangponei soushou koutida.

¹⁴Haiyep kibü mütshuongei ditletla maang kuda; lausikei haang alongbü mütshuong haoen angeadobüei senyüh shemda.

¹⁵Shalejongle shuong shanga jih pendou kho amai; lausikei olinbü maangpon yembü müt langkeia olinko ong kida.

¹⁶Khonsak thonan keibü toje BUNYUBOU to soumo hatbüa shisho kibü maibou.

¹⁷Mangsenyobüa pheshik maibü to jepbo shaubü toje sanouyoko kibü yoa pikshik shaubü maibou.

¹⁸Maangsak yembü mütei lemen longtida; lausikei eaaoabüei hakso sungbada.

¹⁹Haulo haushedbüeibü lamnyu kho jakei shenakei; lausikei maang tangbü haang kho lamkhong la yeida.

²⁰Songbüdobü shouei haobou olintida; lausikei ngoubüloubü mütei ong jembü nyu awealauda.

²¹Songsido akibü thedanga ngoubü kho olinlabü; lausikei songbüdobü mütei ai tangbü janbü ki kho kümlabü.

²²Chemphang songlen aki longa nyekchüh shuong kho aloushadlabü; lausikei songsido maibü kubüei kho haüthükda.

²³Paplepbo jongaibüa müt olinda; hoba jihsiphai to papbü ngüh che kho ailai maikei!

²⁴Songbüdobü mütei phangae Yemsang to leibü khüto aying; lausikei thükae langkei lamto leibüa paida.

²⁵BUNYUBOUei yonglam lilibü chemdang mautilabü; lausikei haoei latnyueibü nyaksinam küp jembulabü.

²⁶BUNYUBOUei shabü maang- pon mangsenda; lausikei jibüphaibü ngüh to hao olinda.

²⁷Nyi ngühmaang alanbü pailetbü hapla haujemda longa, nyi kaibü chemdang thushed to attilabü; lausikei aoei besa anyem to mangsenda hao salang kilabü.

²⁸Müt maibü shuongei haoenei mo ajongaitoua daman- chühda. Shabü mütshuongei tongde jongaida; lausikei khoei khonsak longtida.

²⁹Amaibou ka BUNYUBOU lounyu bangan kia; lausikei haoei saopobü shuongei welaubü ditda.

³⁰Thenyek ngesakbüei maangpon olintida; hoba ngühlang maibüei lo nettida.

³¹Aoei lang kitila hakbü to ngüha lelaje hao songbüdobü shuong yoa chema kilabü.

³²Aoei tangtibü asungletda haoei jembü soushou mangsenda; lausikei aoei hakbü to ditda haoei ditenbü sungletda.

³³BUNYUBOU to soumo hatbü kho songnge donge lenbü, hoba nyensang nyenhang ühüptoua no eaaoa yeijan.