Read Chang Naga TETENTANBÜ 16 Bible Online

TETENTANBÜ 16 - Chang Naga bible

TETENTANBÜ 16

¹Maangpona lamlebü kho müteibü, lausikei jongngaibü kho Mühghaü ka.

²Mütei kümbü ajanjan pendou hao thedanga hinseiakei; lausikei BUNYUBOUei no nongaesaibü matjemda.

³BUNYUBOU la kaibü kümthen pendou nongkuashi, khei yingsije nyi jungan haubüa thüksimin haplabü.

⁴Ajanjan pendou BUNYUBOUei takletbü chenei kümakei, hoba müt amaibü shuongkei maulabü thu shanga kümbei.

⁵BUNYUBOUei yonglam lilibü mangsenda, haoei haoen ashianangeiko akilabü.

⁶Üeisanou hoba maanglemenbü kishi, hoba Mühghaüei kaibü shabü apbulabü. BUNYUBOU to ngüha leashi hoba ka la ai ayinglabü.

⁷Nyi ladang BUNYUBOU olintida, nyi kaibü dangbou shuongkei thangbou lamtila thüklabü.

⁸Maang alanko juong pailetbü toje, maanglanko shisho kibü kho maibou.

⁹Nyi kaibü kümthen kümla thükkei, lausikei Mühghaüei kaibü youyaü shuong leiyeida.

¹⁰Chobaei Mühghaüeibü saopobü hauei ngüh lauda, haoeibü matjem kho ponpendou tükde ki.

¹¹BUNYUBOUei yakbülebü hoba takbülebü pendou maanglanko kümtimang sühda.

¹²Choba shuongei shed shonbü kho mangsenlabü; aishanga songdak setshang kho saopobüei huongkei.

¹³Chobaei maangtangko ngüh mai laubü ngüh ditmangsühda, hoba kho tegübü to maangshikda.

¹⁴Choba khauangbü kho haibü ngühlang künbü him, lausikei songsido kibü mütei kho küpjemtida.

¹⁵Chobaeibü maangshik kho youshapjinei lang thonbü sangmei phatkei hoba khonei langkei kia.

¹⁶Songedonge haplabü kho hon to kei aei maibou hoba chandinam to kei hapbü ngebü maibou.

¹⁷Aoyou wakou maibü ki, khübüei lamnyu amaibü apyoda; hibü no lai aeto haudaje maangsangashi, hoei kaibü langkei püetla thüklabü.

¹⁸Lilisesebüei leilubü longtida, hoba yonglambüei phang to yantida.

¹⁹Yonglambü yoa soletbü nyaksinam janyobü toje shalebü si akainyu shuong ea aoa kibü maibou.

²⁰Aoei lenbüa maangkuda hao naangmailabü, aoei BUNYUBOU to maanglem phoda haoei haüa.

²¹Songbüdobü müt hao haoeibü ditenbüa ngean apda; hoba ngüh haabüei suletjaletbü haatida.

²²Songbüdobü shanga songsido kho langkei deikük, lausikei ngoubü shuong hapti ngetila haujembü kho ngoubü.

²³Maangli maangsang shuongei jembü sembung lishang lomda, hoba haoenei laubüei suletla thükda.

²⁴Maangmai ngüh kho naodei phatkei soushou shanga teibü hoba lo shanga maitibü.

²⁵Müt shanga tükde dogo dambü lamnyu che kia; lausikei thonbüa kho haibü.

²⁶Kümbouleibou müt hao shiang maibüei aei haujembo kümda, aieilausi haoei hao mühei haibü senyüh shemmang sühda.

²⁷Jim akibü mütei mü leilutila hangsilam lamda; hoba haoeibü ngüh kho mü to autibü wan tegü ki.

²⁸Khüpbülangbü mütshuongei nyensha nyenda phaakda, haoenei lemen khangtida hoba maangjam thangbou bangtida.

²⁹Maang toktokbü mütshuongei haoeneibü thangbou shuong suthetda, hoba haoen ayinglam to leida.

³⁰Aoei nyekjok phanga semda haoen to maangsangko chühashi; aoei sembung mulepda haoei huon amaibü longtida.

³¹Saopobü müteibü pailetbü kho salang loubü ki; khuthubü kho soneikangbü khun.

³²Natenbü kho lakjaibou tokei maibou; hoba jembü langkei thepetbü kho sangnyu sangyaang shuong thükbü tokei maibou.

³³Thu kho youshia phokuda; lausikei janthetbü kho BUNYUBOU ka ki.