Read Chang Naga TETENTANBÜ 17 Bible Online

TETENTANBÜ 17 - Chang Naga bible

TETENTANBÜ 17

¹Oyophetyo lemenleenbüei shenan kibü chem chenei lem libü toje takübü shausiyung che senyühshembo shaubü khaibou.

²Himou jungeibü shou che thüka aao mütei songdaklabü, hoba jaisinasi shuong yoa che tegü phetphan phejanei penlabü.

³Hon si chandinam wanei takteida, hoba kho khei BUNYUBOUei müteibü maangpon takteida.

⁴Shabü mütshuongei amaibü dambü aeto maang kuda, hoba yepeijawebü shuongei khüpbülangbü aeto maangkuda.

⁵Nyi shalebü to nyikualonga, nyi haoen Kümbou Mühghaü to nyikuda. Hobaje mü thushed to atjinei nyikualonga no shieikoelabü haang.

⁶Shisishousi shuong kho baushi shuongeibü Choba khun; hoba nyusibou kho shousi shuongeibü the lenenbü.

⁷Yaangenbü shuongei amlang ngüh laubü kho amaisap, hoba ngoubü shuong shanga ngühmai laubü kho jihsiphai apbü onga.

⁸Müt atei besa anyemei sei tegü kümsilei kümda dogo damda, khoei haoenei ajanjan pendou kümla thüklabü dogo haoenei damda.

⁹Nyi mütshuongei no maikutimang sühalonga, haoenei kakhu limbo shedbü kümjinei amai apbushi. Shedbü laueibüei maangjam thangbou bangtida.

¹⁰Ngoubü che to saongaonei ngümbü toje songbüdobü to hakbü khoei aei ditletbü hapda.

¹¹Müt amaibü shuong aoyouei hanghangko lemen longtida, khübü jungto maang amaibü ngühlang künbou tegü loulabü.

¹²Ngoubü che hao ngoubüloubüa haüyobü toje, müt che la sapnyu che jembü shou solangan haüyobü maibou.

¹³Nyi maibü jeiko amaibü kungaia longa, kaibü chemdang ka ladangkei amaibü sattila athüklabü.

¹⁴Oyophetyo khangtibü kho deinyu sametbü che thatibü phatkei; ho aei ohautoua thaktiashi.

¹⁵Saopobü shuong la shedbü kubü ayingsi shabü shuong tangtibü ham BUNYUBOU thedanga mangsenlabü ki.

¹⁶Ditenbü akinyu lai küman ngoubüei songsido jekla nam apda?

¹⁷Thangbou shuongei ponpendou haoeneibü sanou lenda, lausikei jaisina che dangbou la yeila bukda.

¹⁸Asangadobü müt cheei ong müeibü sanghsiyung künkula theletda.

¹⁹Shabü shonmang sühbou kho khonsak longtimang sühbou kho ki; no yong lamalonga nyi khonsak hiletda.

²⁰Ao maang kombei hoba ngüh amai, haoei maibü hapla aikei adameijan; lausikei thushed to ong atlabü.

²¹Ngüha alebü shou kho bou shanga maangto shatlabü; ngouboueibü bou kho olinbü aki.

²²Olinbü maangpon kho moli maibü; lausikei leilubü soushouei lo lintida.

²³Ngühmai lam sepeitiko müt amaibüei huphanga besa leda.

²⁴Ditenbü mütei hapbüngebü ae thenyek sepeida; lausikei ngoubüei kaothon pendou ae nyek theda.

²⁵Ngoubü shouei hao bou maanga lamtida hoba haoeibü bukbü nyu maanglaakko khauekbü sungbada.

²⁶Shedbü akibü ka nam shaulabü kho tangbü aying; müt maibü la kayang kujinei tangbü kho khüpeian apda.

²⁷Hapbüngebü mütei jembü ngüh küpjembo senetda; küpjembü sensimaang yembü kho ditenbü müt.

²⁸Ngoubü chekei haoei ngüh üangjineije songsido kibü tegü damla thükkei. Ladang haoei sembung shileplaje hao haiyep kibü tegü weeida.