Read Chang Naga TETENTANBÜ 18 Bible Online

TETENTANBÜ 18 - Chang Naga bible

TETENTANBÜ 18

¹Mütshuong aoyouei müto apaplepda, haoenei jembü maibü ong lamda; haoenei müei tükde dogo dambü kho aleda.

²Ngoubü cheei haoei denche ditenda si aditenda aikei adambo haoei hao maangli maangsang ong lenmang sühda.

³Shabü si himou liko hauda hoba kaibü nyensang nyenhang mauda; hoba kho jeiko hakbü thükto hakbü ong louda.

⁴Müt cheeibü ngüh yungnyu haübü him; hoba kouko kibü shushou tegü songsihon bakshang yinglabü.

⁵Shettiyatibü la yingkuan saopobü shedbü akakbü matmaibü thangetlabü kho janbü aying.

⁶Ladang ngoubüloubüei pheyo- phanyo khangda, haoei ikok hida.

⁷Ngoubüei ladang ngüh lauda, hao jembü lolo leiluda; hoba haoeibü ngühsunga minda.

⁸Huphang ngüh kho aeibou jemoukei, hoba haoen kho shiang maangto atda.

⁹Haulo haushedbü müt che kho lusaktibü müt amaibü che to jetei.

¹⁰BUNYUBOU kho kaangbüsekbü lapheishon che phatkei, laoboua saopobü shuong püetda.

¹¹Keibü shuongei lailai yinga tegükei, sangnyu che banyu kaangbüsekbü si suokbüei kailepbü tegü, haoeneibü nyaksinamei haoen khümenlabü dogo haoeneibü maanga damda.

¹²Müt hao eaaoa ayei shongko aoeikei hao la soumo akuda; yonglam lilibü müt lamloma leiluda.

¹³Nyi mo ajongaijinei ditan chühashi, nyi khei akümlonga no haang alongko müei awealauko aplabü.

¹⁴No shatjineikei kaibü maangponei leibü tegü kaibü langkei senetan phola thükkei; lausikei ho litia longa kaibü thonbü maanglem kho khüai.

¹⁵Haiyep kibü mütshuongei ponpendou ditletla maangdakko lamlean haiyeida, hoba songsido kibü nouei songsido lamda.

¹⁶No kongnyu müt at to haüyomang sühda sai? Hao la jongsak kuashi hoba ho sosotham yeilabü.

¹⁷Ponpendou matjemshanga matbubouei ngüh aphengai shongkoje shaang ngühlaubou kho ong tangbü yingda.

¹⁸Matjemshanga seisihau kibü müt nyi oyosi phaang lebouei pankula thükkei.

¹⁹Kaibü jaisina to thuiashi hoba sangnyu kabü banyu kaangbü cheei tegü no püetlabü; lausikei no hao to oyoalonga haoei no alottila haoeibü kou khinngailabü.

²⁰Haoeibü sembung kabü hekei müt che shi shenda; haoeibü sembung khop ka latbüei hao senyühshemda.

²¹Lishang haua langkei si haibü thonakei, hoba aoyouei kho sanouda haoenei khoeibü hek shaulabü.

²²Aoyouei yak maibü lamenda haoei peisilei maibü lamenda; hoba hoei BUNYUBOU onoubü hapda.

²³Ladang shalebüei ngüh lauda, haoei eaaoa sukojako laulabü ong kida; lausikei keibüeije ngühlau sometnyu jongaida.

²⁴Maangjam thangbou atje süng ashonda; lausikei thangbou atje jaito natokei aei maangshikbou ki.